بیرلشگن ملت لر تشکیلاتی نینگ انسانی مسکنلشتیریش برنامه سی (UN-Habitat)، افغانستان اوچون بیرلشگن ملت لر تشکیلاتی نینگ مخصوص امانیت صندوقی (UN STFA) حمایه سی بیلن قندوز ولایتیده ضرر کۉرگن عایله لر اوچون ۸۰۰ باشپناه نی قَیته قوریش ایشینی باشله گنینی معلوم قیلدی.
بو برنامه پنجشنبه کونی، ۱۶ میزانده، ایکس اجتماعی ترماغیده، افغانستانگه قَیتیب کېلگن مینگلب عایله لر مناسب باشپناه کمچیلیگی بیلن روپه ره ایکنینی یازگن. بو تشبث اوشبو قَیتیب کېلگنلر اوچون خوفسیز یشش جای لریگه بولگن عاجل ضرورت نی برطرف اېتیشنی مقصد قیلگن.
UN-Habitat بو برنامه نینگ باشلنیشیگه قره مسدن، عمومی باشپناه ضرورتی نینگ کینگلیگینی تاکیدله دی. کۉپلب قَیتیب کېلگن عایله لر اۉز اویلرینی قَیته قوریش یا-ده ترمیم قیلیش اوچون یاردمگه محتاج. تشکیلات خلق ارا همجمعیتدن بو ساحه ده حمایه لرنی آشیریشنی سۉره دی.
بو سعی و حرکت لر، قۉنشی مملکت لردن، خصوصاً پاکستان و ایران دن قَیتیب کېلگن کۉپلب افغان عایله لر نینگ اوی جای، پاک سوو، ساغلیکنی سقلش و تعلیم کبی اساسی خدمت لرگه اېریشیشده قیینچیلیکلرگه دوچ کېلیاتگن بیر پیتده عملگه آشیریلماقده.
بیرلشگن ملت لر تشکیلاتی نینگ قاچقین لر ایشلری بۉییچه عالی کمیشنرلیگی (UNHCR) معلوماتیگه کۉره، ۲۰۲۳ نچی ییل نینگ اکتوبر آییدن بویان تخمیناً ۵.۴ میلیون افغان ایران و پاکستاندن قَیتیب کېلگن. بو کتته قَیتیش تۉلقینی افغانستان نینگ محدود منبع لریگه قۉشیمچه باسیم یره تگن.
منبع: UN-Habitat
🌐
