دایکندی ولایتی نینگ میرامور ولسوالی‌سی نینگ بیر قطار یشاوچی‌لری، محلی طالبان رسمیلری و اوشبو گروه نینگ تخنیکی هیئت کمیسیونی اعضالری، جوز برگر بازار منطقه‌سیده‌گی دولت ییرلرینی اولرنینگ مالک لیگینی ادعا قیلگن کیشی‌لرگه تاپشیرگنلرینی ادعا قیلماقده. بو یشاوچی‌لر پنجشنبه کونی، ۷ عقربده، ۸صبح روزنامه‌سی بیلن صحبت‌ده، بو موضوع نینگ مستقل تیکشیریلیشینی سۉره‌دیلر.
اولرنینگ معلوماتیگه کۉره، آلدین عامه ملکیت صفتیده اجاره‌گه بېریلگن بو ییرلر، حاضر عمومی منفعت‌لرنینگ خلافیگه و خاص کیشی‌لرنینگ فایده‌سیگه فیصله قیلینگن. اولر، سۉنگگی ییللرده طالبان نینگ تخنیکی هیئت کمیسیونی تامانیدن صادر ایتیلگن فیصله‌لر، بو کیشی‌لر اوچون اوشبو ییرلرنی تصرف قیلیش، ساتیب آلیش و ناقانونی قورولیش‌لر قیلیش زمینه‌سینی فراهم قیلگنینی ایتماقده‌لر.
محلی منبع‌لر ۸صبح روزنامه‌سیگه ایتگنلرکه، مالک لیکنی ادعا قیلگن کیشی‌لر، بو ییرلرنینگ حامد کرزی نینگ جمهور رئیس‌لیگی دوریده اولرگه تاپشیریلگنی نی ادعا قیلماقده‌لر. هر حالده، اعتراضچی یشاوچی‌لر، بو کیشی‌لرنینگ سندلری نینگ اعتباری و ییرنینگ حقوقی وضعیتی نینگ قنده‌ی اۉزگرگنی شفاف و مستقل روشده تیکشیریلیشی کېره ک لیگینی تأکیدله ماقده‌لر.
اعتراضچی‌لر شونینگدیک بو دوسیه ده بعضی طالبان رسمیلری نینگ رولی تیکشیریلیشینی هم سۉره‌گنلر. اولر خصوصاً دایکندی ده طالبان نینگ شهرسازی رئیسی و اوشبو کمیسیون اعضاسی عصمت‌الله صالحی نینگ رولی خصوصیده خواطر بیلدیرگنلر و او طالبان قدرت گه ایریشیشدن آلدین، عین شو بازارده موتر وستاسی بۉلگنینی ادعا قیلماقده‌لر.
میرامور یشاوچی‌لری، طالبان نینگ تخنیکی کمیسیونی بعضی اعضالری نینگ دارایی‌لری و قورولیش فعالیت‌لری نینگ آشیشیگه اشاره قیلیب، اولرنینگ مالی منبع‌لری تیکشیریلیشینی هم طلب قیلگنلر. منبع‌لرگه کۉره، بو هیئت نینگ بیر قطار اعضالری سۉنگگی ییللرده مهم سرمایه‌گه ایگه بۉلگن و بعضی‌لری قورولیش بلاک‌لری قورگنلر.
بو یشاوچی‌لر طالبان مرکزی حکومتیدن اجاره سندلری، ادعایی مالک‌لیک مدارکی و کمیسیون فیصله‌لرینی دقت بیلن تیکشیریشینی و ییرلرنینگ حقوقی وضعیتی آیدینلشگونچه، مناقشه لی قسم‌لرده هر قنده‌ی ساتیب آلیش و قورولیشدن توسیق قۉییشینی طلب قیلماقده‌لر. بو قضیه افغانستانده ینگی حاکمیت آستیده فساد و ییر غصبی خصوصیده‌گی خواطرلرنینگ بیر نمونه‌سیگه ایلنگن.
منبع: ۸صبح روزنامه‌سی
🌐
