طالبان حکومتی نینگ ریاست الوزرا اقتصادی اورینباسرلیگی، ملی تدارکات کمیسیونی اوز سونگگی ییغینیده ایکّی میلیارد و سگگیز یوز یتمیش اوچ میلیون افغانی مجموعی ارزشگه ایگه بولگن آلتی کتته برق پروژه‌سینی منظور قیلگنینی اعلان قیلدی. بو پروژه‌لر مملکت نینگ بیر قنچه اساسی ولایتلریده عملگه آشیریله‌دی.
نشر ایتیلگن بیانیه‌گه اساساً، بو پروژه‌لر ننگرهارده‌گی حصارشاهی سب استیشنی نینگ ۲۲۰ کیلوولت‌لیک برق سیمینی کینگه‌یتیریش، فاریاب ولایتیده میمنه و اندخوی سب استیشن‌لرینی قوریش و رواجلنتیریش، و جوزجان ولایتی نینگ یتیم تاق منطقه‌سیده‌گی گاز فابریکه‌سیدن انرژی انتقال بیریش اوچون ۴۰ میگاوات امپیره‌لیک بیر سب استیشن قوریشنی اوز ایچیگه آلگن.
باشقه ایکّی پروژه هم برق انتقال شبکه‌سینی کینگه‌یتیریشگه تیگیشلی. بو پروژه‌لردن بیری ارغندی-غزنی اصلی سیمیدن میدان وردکده‌گی ینگی سب استیشنگه قدر ۹.۳ کیلومتر اوزونلیکده سیم تارتیشنی شامل قیله‌دی. ایکّینچی پروژه ایسه اندخوی سب استیشنیدن ترمیم خانه سب استیشنیگه چه ۱۳۹.۲ کیلومتر اوزونلیکده ۲۲۰ کیلوولت‌لیک سیم تارتیش دیر که، بو مملکت شمالیده برق انتقال ظرفیتینی مهم درجه‌ده آشیریشی کوتیله‌دی.
بونگه قوشیمچه، تدارکات کمیسیونی برشنا شرکتی اوچون SDH و PABX مخابراتی سیستم‌لری اوچون کیره کلی تجهیزاتلرنی ساتیب آلیشنی هم تصویبله‌گن که، بو شرکت نینگ ایچکی ارتباطاتینی یخشی لشگه یاردملشه‌دی.
اقتصادی اورینباسرلیک رسمی‌لری، بو پروژه‌لرنینگ عملگه آشیریلیشی، تیگیشلی ولایتلرده یشاوچیلرگه برق ییتکیزیب بیریشنی یخشی لش و صنعتی و تجارتی فعالیتلرنی قوللب-قوتلشگه مستقیم تأثیر کورسه تیشینی تأکیدله‌دیلر. برق ییتیشمسلیگی افغانستانده اساسی قیینچیلیکردن بیری بولیب، طالبان حکومتی انرژی سکتوریگه سرمایه یاتقیزیش آرقهلی بو مشکلنی کمه‌یتیریشگه حرکت قیلماقده.
بو جریانده، افغانستان اوز کیره کلی برق نینگ کتته قسمینی اوزبیکستان، تاجیکستان و ترکمنستان کبی قوشنی مملکتلردن وارد قیله‌دی. ایچکی انرژی زیربنا‌لرینی رواجلنتیریش، اوزاق مدتده بغلیق لیکنی کمه‌یتیریش و برق شبکه‌سی نینگ پایدارلیگینی آشیریشگه یاردملشیشی ممکن. منبع: ریاست الوزرا اقتصادی اورینباسرلیگی
🌐
