ونزویلا نینگ سابیق جمهور باشلیغی نیکولاس مادورو نیویارک نینگ بروکین قماقخانه‌سیده ساقلنر اېکن، قوران و اینجیل کبی دینی کتابلرنی اۉقیشنی باشله‌دی. نیویورک‌تایمز روزنامه‌سی معلوماتیگه کۉره، مادورو متروپولیتن فدرال توقیفخانه‌سیده اۉز وقتینینگ کۉپ قسمینی دینی اثرلرنی مطالعـه قیلیشگه اجره‌تگن.
اونینگ احوالیدن باخبر بۉلگن کیشیلر مذکور روزنامه‌گه ایتیشیچه، مادورو قماقخانه‌ده معنوی سفرنی باشله‌گن. او دینی کیتابلرنی اۉقیشدن تشقری، حبسخانه‌ده بیر عیسوی دین اربابی و بیر یهودی روحیانی بیلن هم اوچره‌شگن.
نیویورک‌تایمزگه کۉره، مادورو توقیفده بۉلگن مدتده سېزیلرلی درجه‌ده وزنی کمه‌ییب، ارقله‌ب قالگن. باخبر منبعلر نینگ معلوم قیلیشیچه، قماقخانہ طعامینینگ صفتسیزلیگی او نینگ وزنی کمه‌ییشیگه سبب بۉلگن و مادورو نینگ اۉزی هم طعام کیفیتیدن نالیگن.
نیکولاس مادورو و اونینگ عیالی سیلیا فلورس ۲۰۲۶ ییل ۳ جنوری کونی امریکـا کوچلری تامانیدن کاراکاسده قولگه آلیندی و نیویارککه کېتیریلدی. او اوشبو مملکتده آغیر اتهاملر بیلن یوزمه-یوز توریبدی.
اونگه قره‌تیلگن دعوالر آره‌سیده کوکایین قاچاقی، ترورچی گروهلر بیلن همکارلیک، آغیر قوراللرنی ناقانونی سقلش و مخالِف کیشیلرنی عذابلاش کبی مواریدلر بار. بیراق مادورو محکمه‌ده برچه ادعالرنی رد اېتیب، اۉزینی بی‌گناه اېکنیگه تأکید قیلگن.
مادورو قدرتده بۉلگن دوریده هم دینی رهبرلر بیلن یاقیندن علاقـه سقلر اېدی و ۲۰۲۴ ییل جون آییده ونزویلانی حضرت عیسیگه تاپشیرگنینی ایتگن اېدی. آسوشیتدپرس ترقه‌تگن معلوماتگه کۉره، او و عیالی هندی روحیانی رهبر ستیا سای بابا نینگ تینچلیک توغریسیده‌گی تعالیماتیگه هم قیزیقردی.
منبع: نیویورک‌تایمز
🌐
