د طالبانو د کورنیو چارو وزیر سراج الدین حقاني د افغانستان د استقلال د ۱۰۷مې کلیزې د لمانځلو مراسمو کې وویل چې ټول خلک د وږي ۲۸مه د استقلال ورځ مني، خو د وږي ۲۴مه چې د ۲۰۲۱ کال کې د طالبانو د واک ترلاسه کولو کلیزه ده، هیچا نه مني.
حقاني زیاته کړه چې شاید راتلونکې کې، کله چې اوسنۍ نسل نه وي، خلک د وږي ۲۴مه هم ولمانځي. هغه ادعا وکړه چې د طالبانو د واکمنۍ د مستحکمیدو سره، افغان خلک اوس ملي وحدت لري.
د کورنیو چارو وزیر ټینګار وکړ چې استقلال یوازې د یوې تاریخي پیښې لمانځنه نه ده، بلکې هغه وخت بشپړیږي چې یو نسل د طبي، تخنیکي او مسلکي پوهې سره روزل شي ترڅو د افغانستان اړتیاوې پوره کړي او هیواد له نورو هیوادونو سره له تړاو ازاد کړي.
#حقاني #د\_افغانستان\_استقلال #طالبان #د\_وږي\_۲۸مه
