امریکا تشقی ایشلر وزیرلیگی، افغانستان امریکا بیلیم یورتینی نینگ کېله جک ایکّی ییل اوچون ۲۵ میلیون دالرلیک بودجه درخواستی نی رد قیلیب، جاری میلادی ییل نینگ آخریگچه بو بیلیم یورتگه هر قنده ی بودجه تخصیص بیریشنی توختته جکینی اعلان قیلدی.
نیویارک تایمز تامانیدن پنجشنبه کونی، ۱۰ میزان ده، گزارش ایتیلگن بو قرار، طالبان نینگ چیکلاولری سببلی فقط آنلاین تعلیم آرقه لی عالی تحصیلاتگه قول تاپه آله دیگن یوزلب افغان خاتین قیزلرنینگ تحصیل فرصتینی یۉق قیلیشی ممکن.
افغانستان امریکا بیلیم یورتینی نینگ سرپرست رئیسی دیوید ادواردز، بو بیلیم یورت نینگ فعالیتینی دوام ایتتیریشی قرغزستان ده گی مرکزی آسیا امریکا بیلیم یورتی بیلن همکارلیککه شرط قیلینگنینی ایتدی. لیکن او، اوشبو بیلیم یورت نینگ اوزاقدن اۉقیش برنامه سی یۉق لیگینی، حال بوکه حاضرگی پیتده آنلاین تعلیم افغانستان ایچیده گی خاتین قیزلرنینگ عالی تحصیلاتگه قول تاپیشی اوچون یگانه یۉل ایکنینی تأکیدله دی.
ادواردز، «بیز افغان لرنینگ بوتون بیر نسلی اوچون یگانه تعلیم فرصتی میز و بو موضوع امریکا نینگ حاضرگی دولتی نظرگه آلمه یاتگندیک تۇیۇله دی،» دیب ایتدی.
امریکا تشقی ایشلر وزیرلیگی بیر بیانیه ده بو قرار نینگ سببینی «امریکالیک سالیق تۉلاوچی لرنینگ میلیونلب دالر پولی حقیده حساب بیرمسلیک نینگ تکراری سابقه سی» دیب عنوان قیلدی. بو بیلیم یورت ۲۰۱۹ ییلده مالی سوء مدیریت اتهام لری بیلن دوچ کیلگن اېدی، لیکن ادواردز اوتگن مشکل لرنینگ حل ایتیلگنینی و ۲۰۲۱ ییلدن بیری بوتون حسابرسی لرنینگ مشکل سیز بۉلگنینی ایتماقده.
افغانستان امریکا بیلیم یورتیده تخمیناً مینگ ته دانشجو بار بۉلیب، همه لری آنلاین تحصیل آله دیلر. بو دانشجو لرنینگ تخمیناً تۉرت دن اوچی خاتین قیزلر و اولرنینگ ۹۰ فایزیگه یقینی افغانستان ایچیده یشه یدی.
بو بیلیم یورتی ۲۰۰۶ ییلده امریکا نینگ خلق ارا توسعه اداره سی (USAID) نینگ مالی کمکی بیلن تأسیس ایتیلگن و او وقتدن بیری ۲۲۵ میلیون دالردن آرتیق پول آلگن. طالبان نینگ قدرتگه قیتیب کیلیشیدن سۉنگ، بو بیلیم یورت نینگ کابلده گی بناسی اوشبو گروه تامانیدن آلینیب، آتی اۉزگرتیریلدی.
منبع: نیویارک تایمز
🌐
