افغانِستانده یورت قیین‌چیلیکلری حقیده گپ کیتگنده، کوپچیلیک ایته‌دی: «اگر پلانچی کیشی حاکمیّتگه کلسه، همه نرسه توغریله‌نیب کیته‌دی.»
نېمه‌اوشون بیزلر هردایم کوچلی بیر قانون نینگ اورنیگه کوچلی بیر رهبر ایزله‌ش بیلن آواره‌میز؟
بونینگ بیر سببی شوندیق‌که، خلقیمیز قانون نینگ همه اوچون تېنگ تطبیق بولگه‌نینی جوده کم کورگن.
مثال اوچون، قچان‌که بیر کوچلی (زوره‌وان) کیشی قانوننی بوزسه، هېچ‌کیم اوندن حساب سوره‌مه‌یدی. امّا بیر عادی کیشی عینی شو ایشنی قیلسه، جزالَنه‌دی.
یا-ده بیرار کیشی نینگ دولتی اداره‌ده ایشی بولسه، قانونی یولدن بارگن نینگ اورنیگه، اوز ایشی اوچون واسطه قیدیریشگه حرکت قیله‌دی.
قچان‌که خلق شونقه حالتلرنی کورسه، قانونگه بولگن ایشانچی نینگ یوقالیشی و نفوذلی کیشیلرگه یوزله‌نیشی طبیعی بیر حال دیر.
لېکن معما هم دقیقا شو یېرده‌دیر. اگر بارچه امیدیمیز فقتگینه بیر رهبرگه باغلیق بولسه، شو رهبر کیتگنیدن کیین نېمه بوله‌دی؟
بیز افغانِستانده حکومتلر نینگ اوزگریب توریشینی کوپ کوره تورگن‌میز، بیراق اساسی قیین‌چیلیکلریمیز هلی هم اوز حالیده قالگن.
مېنینگ ایشانچیمگه کوره، افغانِستان فقتگینه یخشیره‌ک بیر جمهور رئیسگه محتاج اېمس. بیزلرگه حتّی جمهور رئیس هم اوندن چیقه آلمه‌یدیگن بیر قانون کېره‌ک.
قانون رهبرلر نینگ کوچ-قدرتینی اېمس، بلکه خلق نینگ حقوقلرینی حمایه قیلیشی کېره‌ک.
سونگیده، مېنده بیرگینه سوراق بار:
اگر اېرته‌گه سیز یاقتیرگن رهبر افغانِستان نینگ جمهور رئیسی بولسه-یو، قانون اونینگ چیقرگن بیر قرارینی باسیب-توختاتیب قالسه، سیز قانون تمان توره‌سیزمی یا-ده اوز رهبرینگیز تمان؟
شو سوراق نینگ جوابی، بیزلر قانون حاکمیّتیگه قنچه‌لیک چیندن ایشانیشیمیزنی کورسه‌تیب بېره‌دی.
نور وجوهات
