کابلده گی امید سبز شهرکی نینگ بیر قطار یشاوچیلری نینگ ایتیشیچه، طالبان حکومتی نینگ عدلیه وزیرلیگی اولرنی اۉزلری قورگن اویلری اوچون کرایه تۉلشگه مجبور قیلماقده. بو قرار شهرک اهالیسی آره سیده کینگ کۉلملی غضب و خواطرگه سبب بۉلگن.
یشاوچیلر نینگ سۉزلریگه کۉره، طالبان عدلیه وزیرلیگی نینگ بیر هیئتی بو شهرککه کېلیب، بیر ایده گی هر بیر اتاق اوچون آیده تۉرت مینگ افغانی کرایه تعیینلنگنینی اعلان قیلگن. بو دېمکدیرکه، تۉرت اتاقدن عبارت اویی بۉلگن بیر عایله هر آی طالبان حکومتیگه ۱۶ مینگ افغانی تۉلشی کېره ک. اهالی اۉز عمری بۉیی بو اویلرنی قوریش اوچون زحمت چېکگنلرینی و قوللریده قانونی مالکیت حجتلری بارلیگینی ایتماقده.
طالبان یشاوچیلرگه بو کرایه نینگ جاری ییل (۱۴۰۵) ثور آییدن باشلب تۉلَنیشی کېره کلیگینی اوقتیرگن. بو دېمکدیرکه، هر بیر عایله اۉتگن آلتی آی نینگ کرایه سینی هم بیر یۉله عدلیه وزیرلیگی نینگ بانکی حسابیگه تۉلشی لازم. اولرگه اگر تۉلاو قیلمسلر، اویلرینی بۉشه تیشلری کېره کلیگی ایتگن.
بو اقدام ۱۴۰۵ نچی ییل نینگ ثور آییده طالبان نینگ غصب قیلینگن یېرلر بۉییچه مخصوص محکمه سی تامانیدن اوشبو شهرک نینگ ۱٬۵۰۷ جریب یېری دولتگه قره شلی دېب اعلان قیلینگنیدن سۉنگ عملگه آشیریلماقده. طالبان عدلیه وزیرلیگی بو قرارنی "شرعی" دېب اته ب، اوی ایگه لریگه یېر و خساره پولینی آلیش اوچون آلدین یېرنی اولردن ساتین آلگن کیشیلرگه مراجعه قیلیشلرینی ایتگن.
اسمی فاش ایتیلیشینی ایستمه گن بیر یشاوچی، ۸صبح روزنامه سی بیلن صحبتده بو ایشنی "ظلم و زوروانلیک" دېب اته دی و سۉره دی: "بو قرار اسلامی احکام و عدالتدن آلینگنمی؟" اهالی اۉز یېرلرینی شرعی قباله لر و رسمی معامله لر آرقه لی ساتین آلگنلرینی و حجتلریده هېچ قنده‌ی حقوقی معما یۉقلیگینی تاکیدله ماقده.
بوندن آلدین ۱۴۰۵ نچی ییل نینگ اسد آییده، طالبان عدلیه وزیری عبدالحکیم شرعی، ناحیه لر وکیللری و مسجد امام لرینی چقیریب، اسد نینگ ۱۵ نچی کونیده اویلرنی بۉشه تیشنی بویورگن اېدی. او شونینگدېک هر تورلی خصوصی آلیش-ساتی یاکه کرایه گه بېریشنی منع قیلگن اېدی. کۉپچیلیک یشاوچیلر بو یانداشونی هزاره لر و شیعه لرگه قرشی سیتملی و تبعیضی دېب بیله دی.
منبعلر نینگ ایتیشیچه، طالبان مملکت تشقریسیده یشه یاتگن اوی ایگه لری نینگ اویلرینی اېگه لله ب آلیشگه حرکت قیلیشی ممکن. بو جریان مجبوراً کۉچیریش و بو ملک لرنی طالبان گروهیگه باغلیق کیشیلرگه تاپشیریش احتمالی حقیده گی خواطرلرنی کوچه
یترگن. یشاوچیلر ییغینلر اۉتکزیب، طالبان رهبرلریدن عدلیه وزیرلیگی نینگ بو اقدامی آلدینی آلیشنی سۉره گنلر.
منبع: ۸صبح روزنامه سی
🌐
