بیرلشگن ملت لر تشکیلاتی نینگ بشردوستانه ایشلرنی هماهنگ قیلیش دفتری (اوچا) ۲۰۲۶ نچی ییل نینگ باشلنغیچ سککیز آییده، افغانستانده پارتله مه‌گن مهمات قربانلری نینگ ۷۸ فایزینی باله لر تشکیل ایتگنینی معلوم قیلدی. بو اداره بو وضعیتدن جدی خواطر بیلدریب، بو بحران گه جدی اعتبار قره‌تیلیشینی سۄره‌دی.
اوچا چهارشنبه کونی اکس ترماغیده بیر یادداشت نشر ایتیب، پارتلاووچی ماده‌لرنینگ قالدیقلری هلی هم افغانستان خلقی اوچون کونده‌لیک و اۄلیملی بیر تهدید بۉلیب حسابله نیشینی یازدی. بو یادداشت بیلن بیرگه بېریلگن ویدیوده، اوچا نماینده سی اولگا چریفکو، بو مهماتلر هر لحظه کیشی لرنینگ حیاتی نی آلیشی یاکه اولرنی دایماً معلول قیلیشی ممکن لیگینی ایتگن.
خانم چریفکو قندهارده ثبت ایتیلگن بو ویدیوده، ۱۹۸۰ نچی ییللردن قالگن بیر پارتله مه‌گن گلوله نی یۉق قیله یاتگن بیر تیز عکس العمل تیم نینگ فعالیتیگه اشاره قیلماقده. بو گلوله فقط ایکّی کون آلدین بیر محلی جامعه اعضاسی تامانیدن تاپیلگن اېدی.
اوچا، مملکت بۉیلب ماین تصفیه‌سی گروه لری نینگ سعی و حرکتلریگه قره‌مسدن، بو فعالیتلرنینگ جدی بودجه کمچیلیگی بیلن روپه‌رو ایکنینی تاکیدله ماقده. بو ییل بو بحران نی حل قیلیش اوچون کیره کلی بۉلگن ۱۴.۵ میلیون دالر بودجه دن فقط ۴.۳ میلیون دالری تأمینلنگن.
بو بودجه کمچیلیگی، کۉپلب جامعه لرنینگ هلی هم یېر آستیده ا۬ز قربانلرینی کوتیب یاتگن بیر یشیرین تهدید بیلن یشه شگه مجبور بۉلیشیگه سبب بۉلگن. خانم چریفکو تصفیه قیلیش تیم لری نینگ فعالیتلرینی دوام اېتتیریش اوچون پایدار مالی تأمینات طلب قیلیب، بو حمایت نینگ باله لر، دهقانلر و باشقه تینچ اهالی نینگ حیاتینی حفاظت قیلیش اوچون حیاتی ایکنینی تاکیدله‌دی.
اون ییللیک اوروشلر افغانستان نی ماین و پارتله مه‌گن ماده‌لر بیلن اِنگ کۉپ ککیرلنگن مملکتلردن بیریگه ایلنتیرگن. بو ییل سنبله آییده هم، خوست ولایتیده شونده‌ی ماده‌لردن بیرینی پارتلشی ایکّی باله نینگ حیاتیگه نقطه قۄیدی.
منبع: Zarin TV
🌐
