بیرلشگن ملت لر تشکیلاتی نینگ انسان حق لری بۉییچه عالی کمیشنری ولکر تورک، امریکا قوشمه ایالتلری نینگ خلق ارا جنایی محکمه گه قرشی ینги تحریم لرینی «قبول قیلیب بۉلمس» دېب اته دی و اولرنی بیکار قیلیشنی طلب قیلدی. او روم اساسنامه سیگه اعضا ۱۲۵ مملکت نی اوشبو محکمه نی حمایه قیلیش و اونینگ مستقل فعالیت لرینی دوام اېتتیریشینی تامین لش اوچون فوری تدبیرلر کۉریشگه چقیردی.
جناب تورک عدالت و جوابگرلیک نی تامین لشگه حرکت قیله یاتگن کیشی لرنی هدف آلماق اۉرنیده، جزادن معافیت گه قرشی کوره شیش کېره ک لیگینی تاکیدله دی. اونینگ ایتیشیچه، خلق ارا جنایی محکمه نینگ مستقل لیگی و بی طرف لیگی اسره لیشی شرط و اعضا مملکت لر بو تشکیلات نی قۉللب قوتلش مسؤلیتینی اۉز ذمه لریگه آلیشی کېره ک.
امریکا قوشمه ایالتلری سونگگی پیت لرده خلق ارا جنایی محکمه نینگ امریکالیک عسکرلر و اولرنینگ متفق لری نینگ ایشلری حقیده تیکشیرو لر بیلن شغللنگن خادم لریگه قرشی تحریم لر وضع قیلگن. بو اقدام انسان حق لری تشکیلات لری و بیر قطار مملکت لرنینگ جدی تنقیدیگه دوچ کیلگن.
بیرلشگن ملت لر تشکیلاتی منبع لری نینگ معلوماتیگه کۉره، جناب تورک نینگ بو بیاناتی خلق ارا جنایی محکمه و امریکا اۉرته سیده گی کېسکین لیک آرتگن بیر پیتده بیریلگن. او، «خلق ارا جمعیت خلق ارا عدالت نینگ اۉنلگینی توسیشگه اورینه یاتگن لرگه قرشی توريشی کېره ک» دېب قۉشیمچه قیلدی.
مرکزی هالند نینگ لاهه شهریده جایلشگن خلق ارا جنایی محکمه، نسل کشی لیک، بشریت گه قرشی جنایت لر و اوروش جنایت لری کبی آغیر جنایت لرنی تیکشیریش اوچون تاسیس اېتیلگن. امریکا بو محکمه گه اعضا اېمس و هر دایم اونینگ صلاحیت لریگه قرشی چیققن.
ولکر تورک سۉزی نینگ آخریده، خلق ارا جنایی محکمه نی ضعیف لشتیریش دنیا مقیاسیده قانون حاکمیتی گه زیان یېتکزیب، جنایت قربان لرینی عدالت دن محروم قیلیشینی بیلدیردی. او بارچه مملکت لرنی خلق ارا عدالت نینگ بو مهم نهادینی قۉللب قوتلشنی دوام اېتتیریشگه چقیردی.
منبع: UN News
🌐
