امریکالیک دیپلومات نشریه سی بیر تحلیلی مقاله سیده، طالبان رهبرلری گرچه اۉز حاکمیت لری نینگ بیرینچی دوریده‌گی خطا لریدن درس آلگن و مملکت نی کنترول و مدیریت قیلیش ساحه‌سیده مدافعه لیراق عمل قیلماقده لر، لیکن ایدئولوژیک نقطه نظردن هیچ قنده‌ی اۉزگریش قیلمه‌گنلر دېب یازگن.
پنجشنبه کونی، ۱۶ میزان ده، «طالبان اۉرگنگن درس لر» عنوانی آستیده نشر ایتیلگن اوشبو مقاله، طالبان حکومتی محلی جامعه لرده اۉز نفوذی نی کینگه‌یتیریش، بوتون مملکت بۉیلب حضورینی کوچه‌یتیریش و کۉپلب تیکشیروو پوسته‌لرینی قوریش بیلن افغانستان اۉستیده اۉز کنترولی نی مستحکمله‌گنینی اورغو له‌یدی. اوشبو گروه حاضر ۱۹۹۰ نچی ییل لرده‌گی بیرینچی حاکمیتیگه نسبتاً، اهالی نی نظارت قیلیش و رفت و آمد لرنی مدیریت قیلیش ده کوچلیراق بۉلگن.
شونگه قره‌مسدن، مقاله یازووچیسی اگنیشکا پیکولیکا نینگ یازیشیچه، حکومتدارلیک شیوه‌سیده گی بو اۉزگریش، اوشبو گروه نینگ اساسی اینانچ لری و ایدئولوژی سیده گی اۉزگریش معناسینی بیلدیرمه‌یدی. طالبان تیلگه آلیاتگن امنیتی ثبات، اهالی نینگ اساسی حق و ایرکینلیک لری، خصوصاً خاتین قیزلرگه نسبتاً کینگ چیکلاو لر هزینه‌سی بیلن قولگه کیریتیلگن.
مقاله آلتینچی صنف دن یوقاری قیزلرنینگ تعلیم آلیشی نی منع ایتیلیشی، خاتین لرنینگ ایش و اجتماعی حضوریگه جدی چیکلاو لر و رسانه لر و تنقیدچی لرنی کینگ شکلده باستریلیشینی طالبان حکومتدارلیگی نینگ نتیجه لری صفتیده اشاره قیله‌دی. بو مورد لر شونی کۉرسته‌دی که، طالبان نینگ قدرت نی سقلشده گی توانایی سی نینگ آرتтириلیشی، انسان حق لری وضعیتی نینگ یخشیله نیشی یاکه اجتماعی فضا نینگ آچیلیشی گه سبب بۉلمه‌گن.
دیپلومات شونینگدیک افغانستانده گی چوقور اقتصادی و انسانی بحران لرگه هم تۉخته لگن. قشاقلیک، ایشسیزلیک، غذایی خوفسیزلیک و ایران و پاکستان دن افغان مهاجر لرنینگ کینگ قیتیب کیلیشی سببلی عامه خدمت لرگه آرتگن باسیم، اهالی نینگ بویوک بیر قسمی روپه ره بۉلگن بویوک قیینچیلیک لر دیر.
مقاله نینگ باشقه بیر قسمیده، منطقه مملکت لری نینگ یانده شوو لریگه اشاره ایتیلگن. چین، روسیه و بعضی مرکزی آسیا مملکت لری کبی دولت لر طالبان حکومتی بیلن تعامل قیلگن و اولرنینگ حاکمیتینی بیر سیاسی حقیقت صفتیده قبول قیلگن لر. لیکن یازووچی بو منطقوی تعامل نینگ هم طالبانده ایدئولوژیک اۉزگریش نینگ نشانه‌سی اېمس، بلکه بو مملکت لرنینگ ژئوپلیتیک حساب کتاب لری نینگ نتیجه‌سی ایکنینی تاکیدله‌یدی.
منبع: دیپلومات نشریه سی
🌐
