ناروی قاچقین لر کېنگشی (NRC) نینگ ایتیشیچه، کنر ولایتیده گی ویران قیلغوچی زلزله دن بیر ییل اۉتگنیدن سۉنگ، ضرر کۉرگن عایله‌لر هلی هم اۉز اوی لرینی قیته قوریش و پاک ایچیملیک سووی گه قول تاپیش اوچون عاجل یاردم لرگه محتاج دیرلر. اوشبو گزارش گه اساساً، ضرر کۉرگنلرنینگ اکثریتی هلی هم چادرلر و وقتینچه لیک باشپناه‌لرده یشه ماقده لر.
اوشبو کېنگش جمعه کونی، ۱۷ میزانده، اعلان قیلدی که، اونینگ ایشلاووچی لری بو طبیعی فاجعه دن بیر ییل سۉنگ، قیته دن کنرده گی زلزله دن ضرر کۉرگن منطقه‌لردن کۉریب چیقگنلر. اوشبو کېنگش نینگ افغانستانده گی منطقوی مدیری، جاکوپو کاری دی، بو منطقه‌لرده احتیاج لرنینگ هلی هم جوده کینگ ایکنینی ایتدی.
جناب کاری دی نینگ سۉزلریگه کۉره، «کم ساندکی اهالی باشپناه گه قول تاپگن، حال آنکه ضرر کۉرگنلرنینگ اکثریتی هلی هم چادرلر و وقتینچه لیک باشپناه‌لرده یشه ماقده لر.» او زلزله دن ضرر کۉرگن عایله‌لرنی حمایه قیلیش اوچون بشردوستانه یاردم لرنینگ کۉپه یتیریلیشینی سۉره‌دی تا که اولر اۉز حیات لرینی قیته باشلشلری ممکن بۉلسین.
ناروی قاچقین لر کېنگشی نینگ بو مقامی تاکیدله‌دی: «بشردوستانه سازمان لر و نهاد لرنینگ حمایتی سیز، بو منطقه‌لرنینگ اهالی سی بو فاجعه نینگ نتیجه لریدن قوتولیب، اۉز حیات لرینی عادی وضعیت گه قیتره آلمه‌یدیلر.»
اۉتگن ییل (۱۴۰۴ هجری شمسی) نینگ سنبله آیی نینگ باشلریده، آلتی درجه ریشتر کته لیگیده گی بیر ییر قیمیرلش افغانستان نینگ شرقی ولایت لری جمله دن کنر، ننگرهار و لغمان نی لرزه گه کېلتیردی. یریم کېچه یوز بېرگن بو زلزله، یوزلرچه لای و خشت اوی لرنینگ ییقیلیشیگه سبب بۉلیب، اۉنلرچه عایله نی توپراق آستیده قویگن اېدی.
بو فاجعه، آلدیندن هم جدی قشاقلیک و غذایی خوفسیزلیک بیلن قول و یقه بۉلگن بیر اهالی اۉستیگه کیلدی. او زمانده، طالبان حکومتی بو زلزله ده ایککی مینگدن آرتیق کیشی نینگ جان بېرگنینی اعلان قیلگن اېدی، گرچه تلفات نینگ دقیق سانی هیچ قچان مستقل روشده تاییدلنمه‌دی.
بیر ییل اۉتگنیدن سۉنگ، بو تاغلیق و اوزاق منطقه‌لرده قیته قوریش ایشلری آسته‌لیک بیلن آلغه بارماقده و اونینگ یشاووچی لری هلی هم اۉز اساسی احتیاج لرینی تامینلشده جدی قیینچیلیک لر بیلن روپه ره دیرلر.
منبع: ناروی قاچقین لر کېنگشی
🌐
