دونالد ترامپ حکومتی نینگ خلق آرا جنایی محکمه سیگه (ICC) قرشی تحریم لر وضع قیلیش قراری، خلق آرا سویه‌ده کینگ قاره لش موجی بیلن روپه ره بولدی. کمیده ۱۰ مملکت و خلق آرا نهاد، جمله دن امریکا نینگ اساسی متفقلری، بو اقدامنی قاره لب، اوشبو محکمه نینگ مستقل لیگینی حمایه قیلیش ضرورتینی تاکیدله‌دیلر.
صنعتی ییتّی مملکت (G7) نینگ تشقی ایشلر وزیرلری، جمله دن کانادا، دنمارک، فرانسه، آلمان، ایتالیا، جاپان و بریتانیا بیر مشترک بیانیه‌ده، امریکا نینگ بو قراریدن چوقور افسوسده ایکنلیکلرینی بیلدیردیلر. اولر بو تحریم لرنینگ محکمه نینگ حیاتی فعالیت لری، ایشلاووچی لری و اولرنینگ عایله لرینی شدتلی تاثیر آستیگه آلیشی ممکن لیگیدن آگاهلنتیردیلر.
بیرلشگن ملت لر تشکیلاتی نینگ باش کاتبی آنتونیو گوترش، هم بو قرارنی «خلق آرا عدالت نی عملگه آشیریش اوچون مشترک حرکت لرگه بیر بویوک ضربه» دېب اتدی. اروپا کمیسیونی هم بو اقدامنی قاره لش بیلن بیرگه، محکمه نینگ موثر فعالیتی نی تضمینلش اوچون بو نهاد بیلن یقین همکارلیگینی دوام اېتّیریشینی اعلان قیلدی.
بلجیم و سوئیس مملکت لری هم علیحده روشده بو تحریم لرنی قاره له‌دیلر. بلجیم تشقی ایشلر وزیری، محکمه فعالیت لرینی فلج قیلیشگه حرکت، قربان لرنینگ عدالت گه قول تاپیش یۉلینی باغلیدی دېب ایتدی و بو موضوع نی اروپا اتفاقی سویه‌سیده تعقیب قیلیشینی بیلدیردی.
عفو خلق آرا سازمانی هم بیر کېسکین بیانیه‌ده، مملکت لردن امریکا نینگ بو قراریگه قرشی تۇریش لرینی سۉره‌دی. بو سازمان مملکت لرنینگ قۉرقیشی و بو اقدام بیلن مقابله قیلیشدن باش تارتیشی، خلق آرا عدالت نی ضعیفلشتیریش نی ایسته‌گن کیشی لرنی جسور قیلیشی ممکن لیگیدن آگاهلنتیردی.
عفو خلق آرا سازمانی نینگ یوکسک رتبه لی مدیرلریدن بیری اریکا گوئه وارا روساس، خلق آرا جنایی محکمه سی نینگ روسیه جمهور رئیسی ولادیمیر پوتین و اسرائیل باش وزیری بنیامین نتانیاهو اوچون قولگه آلیش حکمینی چیقریش کبی مهم قرارلریگه اشاره قیلیب، بو تحریم لرنی اوشبو مهم قضایی نهاد نی ایشدن تشلش اوچون بیر حرکت دېب بیله‌دی.
امریکا حکومتی، که بو محکمه نینگ اعضاسی اېمس، اۉز تبعه‌لری یاکه اسرائیل کبی متفقلری حقیده تیکشیروو اوچون اونینگ صلاحیتی نی تن آلمه‌یدی. بو تحریم لر محکمه نینگ افغانستان و فلسطینده گی احتمالی اوروش جنایت لری بۉییچه تیکشیروو لری آرتیدن وضع ایتیلگن.
منبع: خلق آرا خبری گزارش لر
🌐
