افغانستان نینگ سابق ولسی جرگه عضوی فوزیه کوفی، مملکتده بی بی سی رادیوسی نینگ اف ام نشراتی توخته تیلیشیگه عکس العملده، اوشبو رسانه نینگ محلی تیللرده فعالیت قیله یاتگن بعضی خبرچیلرینی تنقید قیلدی.
خانم کوفی نینگ ایتیشیچه، بی بی سی نینگ بو خبرچیلری دواملی روشده افغانستان وضعيتینی حقیقتدن کوره یخشیراق تصویرگه تارتیب و طالبان حکومتی نینگ رسمی لری بیلن کیتمه کیت مصاحبه لرنی نشر قیلگنلر. او بو یانداشو طالبان حاکمیتی آستیده گی وضعیتنی عادی لشتیریشگه یاردم بېرگن دېب ایشانه دی.
اوشبو افغان سیاستچی بی بی سی نشراتی نینگ توخته تیلیشینی «باشقه رسانه لر اوچون بیر درس» دېب توصیفله دی. او رسانه لر معلوماتکه قول تاپیش یا-ده علاقه لرنی سقلش اوچون حقیقتنی ایتیش و گزارش بېریشده دقت قیلیش اصول لرینی ایاق آستی قیلمسلیکلری کېره کلیگینی تاکیدله دی.
کوفی نینگ سوزیگه کوره، رسانه لرنینگ اساسی مسؤلیتی، حتی بو ایش رسمی منبعلرگه قول تاپیش لرینی چېکله سه هم، بی طرفانه و انیق گزارش لرنی تقدیم قیلیش دیر. او ژورنالیستیک اصول لرنی قربان قیلیش نهایتده رسانه نینگ اۉز اعتباریگه زیان ییتکزه دی دېب دلیل کېلتیردی.
بو تنقید لر شونده ی بیر حالده مطرح بۉلماقده که طالبان حکومتی ۲۰۲۱ نچی ییل نینگ اگست آییده افغانستان نینگ کنترولینی قولگه کیریتگنیدن بېری ایرکین رسانه لرگه قرشی جدی چېکلاو لر قۉیگن. رسانه لرنی حمایه قیلوچی تشکیلات لرنینگ گزارشیگه کۉره، اونلب رسانه یاپیلگن و یوزلب خبرچی مملکتنی ترک ایتگن یا-ده ایشینی قولدن بېرگن.
طالبان حکومتی افغانستان بۉیلب بی بی سی نینگ اف ام رادیو نشراتینی توخته تگن، لیکن بو رسانه نینگ نشراتی قیسقه و اۉرته تولقین لر، ستلایت و آنلاین آرقه لی هلی هم قولگه کېلیشی ممکن. بو اقدام افغانستانده خلق ارا و ایچکی رسانه لرگه قرشی کینگ کولملی باسیم نینگ بیر قسمی دېب سنه له دی.
