آغا خان رواجلنتیریش تشکیلاتی (AKDN)، غور ولایتیده گی جام مناره سی نینگ ساختمانی وضعیتی نی بهالنتیریش و اونی اوزاق مدت سقلب قوتیش اوچون علمی ییچیملر تاپیش مقصدیده بیر تحقیق و سقلش لایحه سینی باشله گنینی اعلان قیلدی.
اوشبو تشکیلات بیر بیانیه ده، بو لایحه باشقه ایچکی و تشقی اداره لر بیلن همکارلیکده عملگه آشیریلیشینی بیلدیرگن. بو لایحه نینگ اساسی مقصدی، اوشبو تاریخی بنا روپه رو بولگن ساختمانی قیینچیلیکلرنی یخشیراق چوشونیش و اونینگ کیله جکده بوزولیشی نینگ آلدینی آلیش اوچون عملی توصیه لر تقدیم قیلیشدن عبارت دیر.
جام مناره سی میلادی ۱۲ نچی عصرده قوریلگن بولیب، یونسکو نینگ دنیا میراثلری رویخطیگه کیرگوزیلگن و غوریلر دورانی نینگ معماریلیک صنعتیدن بیر مهم نمونه حسابلنه دی. بو مناره اوزاقده جاییشگنی و موسمی سوو تاشقینلری و بوزولیشلر خطریگه دوچار بولگنی سببلی، جدی خطر بیلن روپه رو دیر.
سونگگی ییللرده، بو مناره نینگ قولب توشیشی ممکن لیگی حقیده گی تشویشلر کوپه یگن. متحصصلر کوپ مرته مناره نینگ اساسی و بدنه سیده گی یاریقلر و زیانلر حقیده آگاهلنترگنلر. طالبان حکومتی هم بو بنا نی سقلش اوچون بعضی سعی و حرکتلر قیلگن، لیکن منبعلر و تخنیکی متخصص ییتشمسلیگی بیر کتته قیینچیلیک بولگن.
آغا خان رواجلنتیریش تشکیلاتی افغانستانده مدنی میراثلرنی سقلش لایحه لری بوییچه اوزاق تاریخگه ایگه. بو تشکیلات آلدینراق کابل و هرات نینگ ایسکی شهرلری و شونینگدیک بابر باغی نینگ قیته قوریش جریانیده مهم رول اوینه گن.
بو ینگی لایحه نینگ باشلنیشی، اوشبو بی همتا تاریخی اثرنی قوتقریش اوچون امیدلرنی آرتیرگن. بو تحقیق نینگ نتیجه لری، کیله جکده گی سقلش اقداملری اوچون علمی اساس یره تیشی و جام مناره سینی سقلش اوچون خلق ارا حمایتنی جلب قیلیشگه یاردم بیریشی کوتیله دی.
بو سعی و حرکتلر فقط گینه بیر تاریخی بنا نی سقلش اوچون ایمس، بلکه افغانستان و دنیا نینگ مدنی و تاریخی کیملیگی نینگ بیر قسمینی سقلب قالیش اوچون هم اهمیتلی دیر.
منبع: آغا خان رواجلنتیریش تشکیلاتی
🌐
