امریکا قۉشمه ایالتلری نینگ مرکزی قوماندانلیگی (سنتکام) عمان دېنگیزی ده کشفیات عملیاتلری بیلن شغللنه یاتگن ایران گه باغلیق بیر کېمه نی یۉق قیلگنینی اعلان قیلدی.
سنتکام پنجشنبه ایرته لب، ۱۵ اکتوبر کونی، ایکس صحیفه سیده بو عملیات نینگ آلتی اکتوبرده آلیب باریلگنینی یازگن. امریکا اردوسی نینگ ادعا قیلیشیچه، بو ایران قَیغی اوشبو منطقه ده گی امریکا دېنگیز کوچلری کېمه لرینی کشف قیلیش و هدفگه آلیش بیلن شغللنگن.
سنتکام بیاناتیده، کېمه یۉق قیلینیشیدن آلدین، اونینگ بارچه خدمه سی خوفسیز روشده چیقاریلگنی و اولرنی قییتریش اوچون تدبیرلر آلیب باریله یاتگنی ایتیلگن. خدمه نینگ سانی و کیملیگی حقیده معلومات بېریلمه گن.
بو حادثه ایران و امریکا اۉرته سیده فارس کۉرفزی و عمان دېنگیزی، خصوصاً هرمز بۉغازی کبی استراتیژیک سوو یۉللری اوستیده گی کنترول بۉییچه تارتیشاولر کوچه ییب بورگن بیر پیتده یوز بېرگن. امریکا و اونینگ متفقلری ایراننی دېنگیزچیلیک خوفسیزلیگینی بوزیشده عیبلب کیلماقده لر.
سنتکام شونینگدېک، اۉتگن یېتتی آی جریانیده ایران اسلام انقلاب قۉریقچیلر کورپوسی (سپاه پاسداران) منطقه سوولریدن اۉتیب تورگن «مینگلب تینچ اهالی دېنگیزچیلرنی تفکیک سیز هدفگه آلگنینی» هم ادعا قیلگن.
ایران هلی گچه سنتکام نینگ بو ادعاسیگه رسمی روشده جواب قیترمه گن. تهران کۉپینچه منطقه ده گی حربی فعالیتلرینی مدافعه ماهیتیده و امریکا نینگ حربی حضوریگه جواب سفتیده توصیفله یدی. بو حادثه ایکّی مملکت اۉرته سیده گی تارتیشاولرنینگ یوقاری باریشیگه سبب بۉلیشی ممکن.
منبع: U.S. Central Command (CENTCOM)
🌐
