طالبان حکومتی نینگ سودا و سرمایه گذارلیک اتاقی مسئوللری و قرقیزستان ایلچیسی، تۉغریدن تۉغری بیر سوداگرلیک یۉلینی ییره تیش، ترانزیت همکارلیکلرنی کېنگه یتیریش و بیش مملکت تېمیر یۉلی پروژه سینی قیته فعال قیلیش باره سیده صحبت قیلگنلر.
طالبان کنترولیده گی باختر خبر آژانسی، پنجشنبه کونی ۲۳ میزان ده، سودا و سرمایه گذارلیک اتاقی نینگ ترانسپورت و ترانزیت کمیته سی نینگ هیئتی کابلده قرقیزستان ایلچیسی تورداکان سیدیکوف بیلن اوچره شگنینی گزارش بیردی.
گزارش اساسیده، ایککی تامان چین، قرقیزستان، تاجیکستان، افغانستان و ایران – بیش مملکت تېمیر یۉلی پروژه سی نینگ اهمیتیگه تاکیدلب، اونی منطقوی باغله نیشنی کوچه‌یتیریش، سودانی رواجلنتیریش و اقتصادی همکارلیکلرنی آشیریش اوچون حیاتی دیب بیلدیرگنلر.
قرقیزستان ایلچیسی بو اوچره شووده اۉز مملکتی نینگ بو مهم پروژه لرنینگ عملی ایشینی باشلش اوچون تیار ایکنینی معلوم قیلدی. او بیشکک نینگ افغانستان بیلن اقتصادی علاقه لرنی مستحکملشگه باغلیلیگینی تاکیدله دی.
بو صحبتلرده، هر ایککی تامان سودانی آسانلشتیریش، ترانسپورتی زیربنالرنی رواجلنتیریش و ایککی مملکت اورته سیده گی عمومی اقتصادی علاقه لرنی کوچه‌یتیریش اوچون همکارلیکلرنی دوام ایتتیریش ضرورتیگه تاکیدله دیلر. تۉغریدن تۉغری سوداگرلیک یۉلینی ییره تیش، ماللرنی انتقال بیریش وقتی و هزینه سینی اهمیتلی درجه ده کمه یتیریشی ممکن.
ییللردن بېری بحث قیلینه یاتگن بیش مملکت تېمیر یۉلی پروژه سی، اگر اجرا قیلینسه، افغانستاننی منطقه ده مهم بیر ترانزیتی مرکزگه ایلنتیریشی و بو مملکت و منطقه اقتصادینی اۉزگرتیریشی ممکن. بو تېمیر یۉلی، چین نی اورته آسیا آرقه لی ایرانگه و او یېردن دنیا بازارلریگه باغلیدی.
منبع: باختر خبر آژانسی
🌐
