کینیا نینگ مومباسا شهریده گی بیر محکمه، بیر مسیحی فرقه سی نینگ اۉزینی رهبر اعلان قیلگن پاول مکنزی و اونینگ ۲۸ همکارینی ۱۹۱ کیشی نی، که اولردن ۱۹۰ نفری باله دیر، اۉلدیریش جرمی بیلن مجرم تانیلدی.
مکنزی «خوش خبر خلق ارا کلیساسی» ناملی بیر فرقه نینگ رهبری اېدی و اۉز پیرولرینی «عیسی بیلن اوچره شیش» اوچون اۉزلرینی اۉلگونچه آچ قوییشگه تشویق قیلگنلیکده عیبلنگن. او بو فرقه نی ۲۰۰۳ نچی ییلده تأسیس قیلگن اېدی.
بو قۉرقینچلی دوسیه ۲۰۲۳ نچی ییل اپریل آیی ده بیر حقوق گروهی نینگ رسمی لرگه خبر بېریشی آرتیدن فاش بۉلدی. پولیس عملیاتیده، اونینگ جوده ضعیفلشگن بعضی پیرولری قوتقزیلدی، اما سۉنگگی تیکشیرولر ساحلی شهر مالیندی یقینیده گی شاکاهولا جنگلیده یوزلب جماعی قبرلرنینگ تاپیلیشیگه سبب بۉلدی.
محلی رسانه لر بو واقعه نی «شاکاهولا جنگلی قتل عامی» دیب نومله دیلر. بو دوسیه دنیا نینگ حاضرگی تاریخیده مذهبی فرقه لر بیلن باغلیق اېنگ یمان فاجعه لردن بیری حسابلنه دی.
پاول مکنزی و اونینگ همکارلری قتل، شکنجه و تروریزم کبی کۉپلب عیبلرگه دوچ کېلگن اېدیلر. محکمه دوشنبه کونی، ۱۹ اکتوبرده، قتل عیبی بۉییچه اولرنینگ مجرملیگی حقیده حکم چیقردی. اولرنینگ جزاسی محکمه نینگ کېله
جک جلسه لریده تعیین ایتیلیشی کوتیله دی.
بو فاجعه کینیاده مذهبی گروه لرنینگ فعالیتلرینی کۉپراق نظارت قیلیش و خلق نینگ ایشانچیدن یمان فایده لنیش نینگ آلدینی آلیش ضرورتی حقیده کینگ بحث لرنی قۉزغتدی. کینیا حکومتی بونده‌ی گروه لرنی ثبت قیلیش و فعالیت یوریتیشی اوچون قتتیقراق قانونلر وضع قیلیشگه وعده بېرگن.
منبع: خلق ارا رسانه لر
🌐
