واشنگتن پوست روزنامه سی نینگ خبر بېریشیچه، دونالد ترمپ حکومتی امریکا قۉشینلری نینگ افغانستاندن چیقیشی تېکشیرووی گزارشینی امریکا نینگ اۉرته دېوره سیلاولریدن آلدین نشر اېتیشی ممکن. بو حرکت امریکا نینگ افغانستانده گی ییگیرمه ییللیک اوروشی نینگ سۉنگی حقیده گی بحثلرنی قیته دن قیزغین لشتیریشی ممکن.
اوشبو روزنامه دوشنبه کونی، ۲۷ میزانده، آگاه منبعلرگه تیه نیب یازیشیچه، امریکا اردوسی نینگ حاضرگی و سابق رهبرلری اۉزلرینی بو گزارش نینگ نشری اوچون تیارله ماقده لر. بو تېکشیروو امریکا مدافعه وزیری پیت هگست نینگ بویروغی بیلن عملگه آشیریلگن بۉلیب، ۲۰۲۱ نچی ییل نینگ اگست آییده افغانستان نینگ سابق حکومتی ییقیلگنیدن سۉنگ امریکا قۉشینلری نینگ چیقیش جریانی و تخلیه عملیاتینی نظارت قیلگن بیر قطار یوکسک مرتبه لی حربی ضابطلر بیلن مصاحبه لرنی اۉز ایچیگه آلگن.
امریکا نینگ سابق جمهور رئیسی دونالد ترمپ، اۉز سیلاو کمپاینلری جریانیده، جو بایدن حکومتی نینگ افغانستان اوروشی سۉنگی باره سیده گی قرارلریده رولی بۉلگن کیشیلرنی جوابگرلیککه تارتیشگه وعده بېرگندی. جناب هگست هم بو وعده نی عملی قیلیشگه متعهد ایکنینی ایتگن.
گرچه بو گزارش نینگ نشر اېتیلیشی نینگ انیق زمانی حاضرگچه بللی بۉلمسه ده، لیکن واشنگتن پوست اۉز منبعلریگه اساسله نیب، بو تېکشیروو نینگ تاپیلگنلری اوچینچی نوامبرده گی اۉرته دېوره سیلاولریدن آلدین نشر اېتیلیشی ممکن لیگینی ایتگن. اولرنینگ سۉزلریگه کۉره، بو گزارشده او زمانده دخیل بۉلگن جنراللرگه قرشی انضباطی ایشلر تکلیف قیلینیشی ممکن.
کابل تخلیه عملیاتی حقیده گی آلدینگی تېکشیرولر کۉرستیشیچه، کۉپلب یوکسک مرتبه لی امریکا جنرال لری توختَوسیز روشده، امریکا قۉشینلری نینگ تۉلیق چیقیشی افغانستان حکومتی نینگ تېز ییقیلیشیگه سبب بۉلیشی ممکن لیگینی آگاهلنتیرگندیلر. بو جنراللر آره سیده کنت مک
کنزی، مارک میلی و آستین «اسکات» میلر نی نام آلماق ممکن.
مارک میلی او وقتده امریکا اردوسی نینگ مشترک ستاد باشلیغی و جمهور رئیس بایدن نینگ ارشد حربی مصلحتچیسی اېدی. او و جنرال مک
کنزی ایتگنلر که، ترمپ دولتی نینگ ۲۰۲۰ نچی ییلده طالبان بیلن قۉشینلرنینگ تۉلیق چیقیشی اوچون قیلگن کیلیشووی، افغانستان ملی اردوسی و حکومتی نینگ ییقیلیشیده مهم رول اۉینه گن.
تخلیه عملیاتیدن بیر آی آلدین افغانستانده گی اینگ یوکسک مرتبه لی امریکا جنرالی بۉلگن جنرال میلر هم، امریکا قانون چقرووچیلری بیلن بیر مخفی مصاحبه ده، چیقیشدن سۉنگ امنیتی وضعیت نینگ تېزلیک بیلن یامانلشیشی باره سیده تکرار و تکرار آگاهلنتیرگن لیگینی ایتگندی. اونینگ سۉزلریگه کۉره، افغانستان ۲۰۲۰ نچی ییل نینگ مارچ آییدن، یعنی دوحه کیلیشووی دن آز کیین، "آلاو ایچیده یانیب تورگن" بیر وضعیتده اېدی.
منبع: واشنگتن پوست
🌐
