منبع‌لر رسانه‌لرگه، محلی طالبان مقام‌لری بغلان مرکزی، تخار نینگ ینگی قلعه و قندوز نینگ امام صاحب ولسوالی‌لریده اۉزبېک تیلی ملی کونی مراسملرینی اۉتکزیشگه مانع بولگنینی ایتگنلر.
منبع‌لرنینگ ایتیشیچه، اۉزبېک فرهنگی فعاللری تامانیدن ریجه لشتیریلگن بو مراسم‌لر، طالبان نینگ مخالفتی سبب لغو قیلینگن. بو، بغلان مرکزی ده گی مراسم نینگ طالبان مقام‌لری بیلن آلدیندن هماهنگ قیلینگن حالده تنظیم لنگنیگه قره‌مسدن، نهایتده اۉتکزیلیشیگه رخصت بېریلمه‌دی. اوشبو اقدام، افغانستانده فرهنگی و تیلی فعالیتلرگه قره‌تیلگن کینگ‌راق چېکلاولرنینگ بیر قسمی صفتیده کۉریله‌دی.
بو ممنوعیت، بدخشان ولایتیده گی اۉخشش بیر اقدام آرتیدن یوز بېرگن. بیر مدت آلدین، طالبان نینگ بدخشان والیسی رحمت‌الله نجیب، فیض‌آباد شهریده اۉزبېک تیلی کونی مراسمی نینگ اۉتکزیلیشیگه توسیق بولگن ایدی. اوشبو مراسم ۱ عقرب کونی اۉتکزیلیشی قرار قیلینگن و طالبان نینگ اطلاعات و فرهنگ ریاستی هم رسمی روشده اونگه رخصت بیرگن ایدی، لیکن والی مراسمدن بیر کېچه آلدین اونینگ لغو ایتیلیشی توغریسیده بویروق چیقاردی.
بعضی منبع‌لرنینگ ایتیشیچه، بدخشان والیسی نینگ بویروغیدن سۉنگ، بونده‌ی مراسم‌لرنی اۉتکزیش ممنوعیتی باشقه منطقه‌لرگه هم کینگه
йگن، لیکن طالبان حکومتی بو خصوصده عمومی بیر دستور چیقارگن می یا یۉق، انیق ایمس.
افغانستان نینگ سابق حکومتی ۲۹ میزان کونینی اۉزبېک تیلی ملی کونی صفتیده نام لگن ایدی و هر ییلی بو کوندن دولتی و خصوصی اداره‌لرده نشانلنر ایدی. اۉزبېک تیلی دری و پشتو تیللری بیلن بیر قطارده افغانستان نینگ اوچ رسمی تیلیدن بیری دیر.
طالبان حکومتی اوتگن ییللرده تورلی گروه‌لرنینگ فرهنگی، مذهبی و قومی مراسملرینی اۉتکزیشگه بیر نېچه مرته توسیق بولگن. بو اقدام‌لر ایچیگه محرم آییده شیعه‌لرنینگ عزا مراسملرینی منع قیلیش و بعضی دولتی اداره‌لرنینگ لوحه لریدن فارسی و اۉزبېکی یازوولرنی آلیب تشلش هم کیره‌دی که مملکتده فرهنگی و تیلی حقوقلر توغریسیده گی تشویشلرنی آرتیرگن. منبع: افغانستان اینترنشنال
🌐
