افغانستان نینگ ۱۵ یاشگچه بۉلگن فوتبال ملی تیمی، خلق ارا فوتبال فستیوالی مسابقه‌لری نینگ دوامیده میزبان تیم، آذربایجان نی مغلوب قیلدی. عادی وقتده تېنگلیک بیلن توگه‌گن بو اۉیین، پنالتیلر ضربه‌لریده اوچ ایککی نتیجه‌سی بیلن افغانستان نینگ غلبه‌سی بیلن یکونلندی.
بو، مملکت اۉیینچیلری نینگ بو مسابقه‌لرده‌گی ییتینچی غلبه‌سی ایدی. اولر بوندن آلدین آلتی غلبه و اوچ مغلوبیت نی اۉز کارنامه‌لریده ثبت قیلگن ایدیلر. میزبان تیمگه قرشی بو غلبه، افغانستان نینگ یاش اۉیینچیلری نینگ روحیه‌سینی کېله جک اۉیینلر اوچون کۉتردی.
خلق ارا فوتبال فستیوالی مسابقه‌لری بیرینچی مرته خلق ارا فوتبال فدراسیونی (فیفا) تامانیدن و ۱۹۰ مملکت نینگ ۱۵ یاشگچه بۉلگن یاشلر تیمی اشتراکیده اۉتکزیلماقده. بو دور مسابقه‌لرنینگ میزبانلیگی آذربایجان مملکتی نینگ ذمہ‌سیده دیر.
بو فستیوالنی اۉتکزیشدن مقصد، بوتون دنیا بوییچه یاش استعدادلرنی کشف قیلیش و یاش اۉیینچیلرگه خلق ارا تجربه کسب ایتیش اوچون فرصت یره تیش دیر. افغانستان تیمی بو مسابقه‌لرده دنیا نینگ مختلف قاره لریدن کوچلی تیملر بیلن میدانگه توشیب و مهم نتیجه‌لرنی قولگه کیریتگن.
افغانستان فوتبال فدراسیونی، بو غلبه نی اۉیینچیلر و فنی هیئتگه تبریکلب، بو موفقیتلر مملکتده فوتبال نینگ اساسی رواجلنیشی و کینگه‌یشیگه زمینه یره تیشیگه امید بیلدیردی. فدراسیون، یاشلر تیمی کتگوریه لریگه سرمایه کیریتیش اونینگ اساسی اولویتلریدن بیری ایکنینی ایتدی.
ورزش متخصص‌لری هم بو غلبه نی افغانستان فوتبالی اوچون مهم دیب بهاله‌دیلر و بونده‌ی نتیجه‌لر مملکتده پارلاق استعدادلرنینگ موجودلیگینی کۉرسته‌دی دیب ایشانه‌دیلر که، مناسب حمایت و ریجه لشتیریش بیلن کېله جکده فوتبال یولدوزلریگه ایلنیشی ممکن.
منبع: زرین تی وی
🌐
