بیرلشگن ملت‌لر تشکیلاتی نینگ باله‌لرنی حمایه قیلووچی صندوقی (یونیسف) افغانستانده واکسیناسیون نینگ سۉنگگی دوری کمپاینیده ۱۲.۷ میلیون باله نینگ پولیو (فلج اطفال) کسللیگیگه قرشی واکسین قیلینگنینی اعلان قیلدی. اوشبو اداره جمعه کونی، ۸-عقربده، بیر بیانیه ترقه تیب، بوتون مملکت بوییچه بو کسللیکنی بوتونلی یۉق قیلیش اوچون سعی-حرکتلر دوام ایتیب تورگنینی ایتدی.
یونیسف، افغانستان دنیا ده وحشی پولیو ویروسی حلی هم بومی شکلده موجود بۉلگن ایککی مملکتدن بیری ایکنینی قۉشیمچه قیلدی. بو اداره، اوشبو کمپاین نینگ موفقیتلی عملگه آشیریلیشیده طالبان حکومتی، صحی خادملر و محلی رهبرلرنینگ همکارلیگینی تقدیرله‌دی. شونگه قره‌مسدن، اوزاق و ناآرام منطقه‌لرده‌گی برچه باله‌لرگه ییتیب باریش حلی هم بیر چالش بۉلیب قالماقده.
بو اعلان، بیرلشگن ملت‌لر تشکیلاتی نینگ یاقینده افغانستانده پولیو ویروسیگه چلینگن آلتی ته ینگی واقعه‌نی انیقلگنی حقیده خبر بېرگنی پیتگه تۉغری کېله‌دی. بو ینگی واقعه‌لرنینگ ثبت ایتیلیشی بیلن، جاری میلادی ییل باشیدن بویان مملکتده بو کسللیککه مبتلا بۉلگنلرنینگ عمومی سانی ۴۲ کیشیگه ییتدی. بو واقعه‌لرنینگ کپچیلیکی مملکت نینگ شرقی ولایتلریده ثبت ایتیلگن.
افغانستان و پاکستان دنیا ده پولیو کسللیگی حلی هم بوتونلی یۉق ایتیلمه‌گن یکانه ایککی مملکت دیر. گرچه سۉنگگی ییللرده بو کسللیککه قرشی کوره‌شده مهم پیشرفت‌لر بۉلگن، لیکن ناامنی، واکسین حقیده تۉغری بولمه‌گن معلوماتلر و فرهنگی چیکلاولر حلی هم اونینگ بوتونلی یۉق ایتیلیشی یلیده توسیقلر یره تماقده.
پولیو، اساساً بیش یاشدن کیچیک باله‌لرگه تأثیر قیلووچی یوقوملی بیر ویروسی کسللیک دیر. بو ویروس عصبی سیستمگه هجوم قیلیب، بیر نیچه ساعت ایچیده دایمی فلجگه سبب بۉلیشی ممکن. بو کسللیک نینگ درمانی یۉق، لیکن تکراری واکسیناسیون بیلن اوندن موثر شکلده آلدینی آلیش ممکن.
دنیا ساغلیقنی سقلش تشکیلاتی و اونینگ شریک‌لری، پولیو بوتونلی یۉق ایتیلگونچه افغانستان و پاکستانده واکسیناسیون برنامه‌لرینی قوللب-قوتلشگه دوام ایتیشلرینی وعده بېرگنلر. اولر برچه عایله‌لردن باله‌لری نینگ کمپاین نینگ هر دوریده پولیو واکسینینی آلیشلرینی تأمینلشلری نی سۉره‌یدیلر.
منبع: یونیسف
🌐
