پاکستان اردوسی جمعه کونی بلوچستان ایالتیده بیر امنیتی پوسته گه قره‌تیلگن درون هجومینی دفع قیلگنی و بیش ته درون نی هدفگه ییتیشدن آلدین یۉق قیلگنینی اعلان قیلدی. بو حادثه افغانستان بیلن چېگره داش بیر منطقه‌ده یوز بېرگن.
پاکستان قوراللی کوچلری نینگ عامه علاقه‌لر بۉلیمی (ISPR) تامانیدن ترقه تیلگن بیر بیانیه‌گه اساساً، بو درون هجومی پنج‌شنبه کونی، ۷-عقربده، اردو اونی «فتنه هندوستان» دیب آتگن بیر گروه تامانیدن عملگه آشیریلگن. بو اصطلاح معمولاً پاکستان نینگ رسمی ادبیاتیده «بلوچستان آزادلیک اردوسی» (BLA) اوچون ایشلتیله‌دی.
اردو، عصیانچیلرنینگ بو پست سویه لی و تجارتی درونلردن فایده لنیب، بلوچستان ایالتی نینگ «خاران» تومنیده‌گی «البات» منطقه‌سیده امنیتی کوچلرنینگ بیر پوسته‌سینی نشانگه آلیشنی قصد قیلگنلرینی قۉشیمچه قیلدی. بیانیه‌ده امنیتی کوچلرنینگ «تېز و موثر جوابی» هر قنده‌ی تلفات و زیان نینگ آلدینی آلگنی ایتیلگن.
افغانستان و ایران بیلن اوزون چېگره‌لرگه ایگه بۉلگن پاکستان نینگ بلوچستان ایالتی، اون ییللردن بېری بلوچ آیریلیشچی گروهلری و پاکستان امنیتی کوچلری آره‌سیده‌گی شدتلی توقنشولر صحنه‌سی بۉلیب کیلماقده. بو ایالت، خیبرپختونخوا دن سۉنگ، او مملکت نینگ ایککینچی ناآرام ایالتی سنه له‌دی.
بلوچستان آزادلیک اردوسی (BLA) و باشقه قوراللی بلوچ گروهلری کۉپ مرته بو ایالتده امنیتی کوچلر و زیربنایی لایحه‌لرگه قرشی اۉلیملی هجوملر اویوشتیرگنلر. پاکستان، بو گروهلرنینگ، پاکستان طالبان تحریکی (TTP) بیلن بیرگه، اۉز هجوملرینی ریجه لشتیریش و عملگه آشیریش اوچون افغانستان توپراغیدن خوفسیز پناهگاه صفتیده فایده لنیشینی ادعا قیله‌دی.
بو ادعالر هر دایم افغانستانده‌گی طالبان حکومتی تامانیدن رد ایتیلگن. طالبان مقام‌لری، هیچ قنده‌ی گروهگه افغانستان توپراغیدن باشقه مملکتلرگه، خصوصاً قۉشنیلرگه قرشی فایده لنیشگه رخصت بېرمه سلیکلارینی تأکیدله‌گنلر. شونگه قره‌مسدن، چېگره آشه هجوملر حلی هم کابل و اسلام‌آباد آره‌سیده‌گی علاقه‌لرده بیر جنجللی موضوع بۉلیب قالماقده.
منبع: پاکستان اردوسی
🌐
