قندهار شهریده‌گی بیر قنچه دوکاندار، طالبان حکومتی «میرویس» و «روشن» ناملی ایکّی کتته تجارتی مرکزنی بوزیش نیتیده ایکنینی ایتماقده. اولر، جدی خواطر بیلدریب، طالباندن عادلانه غرامت تۉله شنی طلب قیلگنلر.
بو ایکّی تجارتی مرکز، قندهار شهری نینگ ارگ بازار منطقه‌سیده، شهرداری بناسی و طالبان والی‌سی نینگ دفتری یقینیده جایله شگن. دوکاندارلرنینگ سۉزلریگه کۉره، طالبان اولرگه تیزلیک بیلن دوکانلرینی بۉشه تیشنی بیلدیرگن، لیکن غرامت تۉلش یاکه آلترنتیف جای بیریش حقیده هیچ نرسه دیمه‌گن.
دوکاندارلر، بو ایکّی مرکزده تقریباً ۴۰۰ میلیون افغانی سرمایه یاتقیزیلگنینی و اولرنینگ بوزیلیشی محلی اقتصادگه آغیر ضربه بیریشینی تأکیدله ماقده‌لر. اولرنینگ ایتشیچه، بو اقدام یوزلب کیشی‌نی ایشسیز قیلدیریب، کوپلب عایله‌لرنی یگانه درآمد منبع لریدن محروم بولیش خطری بیلن دوچ قیله‌دی.
بیر دوکاندار شونده‌ی دېدی: «بیز طالباندن بوزیشدن آلدین بیزنینگ تقدیرمیزنی انیقلشلرینی سۉره یمیز. یا بیزگه مناسب جای بېرسینلر یاکه سرمایه میزنینگ تاوانینی تۉلسینلر.»
شونینگدیک، قندهارده‌گی طالبان شهرداری‌سی بو ایکّی مرکزنی بوزیش ریجه‌سینی تصدیقله‌گن. اوشبو اداره، بو مرکز‌لرنینگ اورنیده ایکّی کتته، ینگی و زمانه وی تجارتی مجتمع قوریش نیتیده ایکنینی ایتگن. لیکن، شهردارلیک هم دوکاندارلرنینگ ضررینی قیریب جبران قیلیش باره‌سیده سکوت اختیار قیلگن.
بو موضوع، طالبان نینگ خصوصی ملکیتلرگه بولگن مناسبتی حقیده‌گی خواطرلرنی آشیریب یوبارگن. قندهار یشاوچیلری نینگ ایتیشیچه، سونگگی ییللرده مناسب استملاک یاکه غرامت تۉلنمسدن اویلر و دوکانلرنینگ بوزیلیش واقعه‌لری کوپ یوز بیرگن.
«افغان ویتنس» نهادی نینگ ۲۰۲۴-ییلی نوامبرده نشر ایتیلگن تحقیقی گزارشیگه اساساً، کابلده‌گی طالبان شهرداری‌سی ۲۰۲۱-ییل اگست آییدن ۲۰۲۴-ییل اگست آیigacha تقریباً ۱.۵ میلیون متر مربع ییرنی تازه لگن که، بو اوزی ایچیگه مینگلب یشاش اویلری و تجارتی ملکیتلرنی آلگن. اوشبو گزارش هم کوپلب زیان کورگن عایله‌لرنینگ تولیق غرامت آلمه گنلیکلرینی تصدیقله‌یدی. منبع: محلی رسانه‌لر
🌐
