بیرلشگن ملت‌لر تشکیلاتی‌ده افغانستان نینگ دایمی نماینده‌لیگی باشلیغی نصیراحمد فایق، طالبان تامانیدن «سیستملی باستیش و تبعیض» گه خاتمه بیریش و افغانستان خلقی نینگ، خصوصاً عیاللر و قیزلرنینگ اساسی حقوقلرینی تیزلیک بیلن قیته تیکلشگه چقیردی.
جناب فایق شنبه کونی، ۹ عقربده، اوز ایکس صحیفه‌سیده، بو طلب‌لرنینگ بیرلشگن ملت‌لر تشکیلاتی عمومی ییغینیده انسانی حقوقلر کینگه‌شی گزارشی حقیده‌گی افغانستان رسمی بیانیه‌سیده اورته‌گه قوییلگنینی بیلدیردی. او، افغانستانده‌گی انسانی حقوقلرنینگ آغیر وضعیتی خلق ارا همجمعیت نینگ فوری و جدی دقتیگه محتاج ایکنینی تأکیدله‌دی.
اوشبو بیانیه‌ده، افغانستان انسانی حقوقلری بوییچه بیرلشگن ملت‌لر تشکیلاتی مخصوص گزارشچیسی ریچارد بنت نینگ نظارت قیلیش مأموریتی‌نی تولیق قوللب-قوتلش ضرورتیگه اورغو بیریلگن. شونینگدیک، افغانستان نماینده‌لیگی مملکتده انسانی حقوقلر پایمال ایتیلیشی موردلرینی دقت بیلن تیکشیریش و اونینگ دلیل‌لرینی حجت لشتیریش اوچون مستقل بیر تحقیقاتی میکانیزم فعالیتینی تیزلیک بیلن باشلشنی سۉره‌دی.
بیانیه نینگ اساسی نقطه لریدن بیری عدالت و حساب بیریشنی تأمینلشگه قره‌تیلگن تأکید ایدی. جناب فایق: «انسانی حقوقلرنی قوپال شکلده پایمال ایتگنلر جزادن معاف ایتیلمسلیگی کیره ک» دیب ایتدی. اوشبو نماینده‌لیک، جزادن معاف ایتیلیش، زوروانلیک و عدالتسیزلیک دایره‌سینی دوام ایتتیریشیگه ایشانه‌دی.
افغانستان نینگ بیرلشگن ملت‌لر تشکیلاتی‌ده‌گی نماینده‌لیگی، خلق ارا همجمعیت نینگ طالبان بیلن هر قنده‌ی تعاملی «اصولگه اساسلنگن و مشروط» بولیشی و انسانی حقوقلر ساحه‌سیده حقیقی و اولچه نه‌دیگن یوتوقلرگه بغلیق بولیشی کیره ک لیگینی انیقلشتیریب اوتدی. بیانیه، شرطسیز تعامل، جمعیت نینگ تورلی گروهلرینی، خصوصاً عیاللرنی سیستملی باستیش و حذف قیلیشنی عادیلشتیریشگه سبب بولیشی ممکنلیگیدن آگاهلنتیره‌دی.
بیانیه نینگ باشقه بیر قسمیده، افغانستان خلقیگه بشردوستانه یاردملر دوامی، قوشنی مملکتلرده‌گی افغان پناهنده‌لرینی قوللب-قوتلش و مجبورلب قیترمَسلیک اصلیگه تولیق رعایت ایتیلیشی ضرورتی تأکیدلنگن.
نصیراحمد فایق سۉنگّیده تأکیدله‌دی: «افغانستان خلقی نینگ حقوقلری سودا موضوعی ایمس و انسانی حقوقلر بوییچه خلق ارا مجوریتلر عملی و معنالی اقداملرگه ایلنتیریلیشی کیره ک». منبع: نصیراحمد فایق نینگ ایکس صحیفه‌سی
🌐
