هرات ده گی طالبان پولیس قوماندانلیگی اسلام قلعه چېگره گمرکیده کینگ کولملی بیر یانغین یوز بېرگنیدن خبر بېردی. چهارشنبه آخشامی، ۸ میزانده، یوز بېرگن بو واقعه، یانیلغی تشووچی ۱۵ تانکر نینگ تۉلیق یانیب کېتیشیگه سبب بولди. مقام لرنینگ ایتیشیچه، بو حادثه ده جان تلفاتی یۉق.
طالبان پولیسی تامانیدن ترقه تیلگن معلومات اساسیده، دستلبکی تیکشیروو لر شونی کۉرسته دی که، بو یانغین جریانیده تۉلیق یۉق بولگن ۱۵ تانکردن تشقری، باشقه اوچ تانکر هم قسمی شکلده زیان کۉرگن. اۉت اۉچیرووچی گروه لر کۉپ سعی و حرکتلردن سۉنگ اۉت نی نظارت آستیگه آلیشگه موفق بولدیلر.
محلی منبعلر آلدینراق رسانه لرگه ایتگن اېدیلر که یانغین جوده کینگ کولملی بولگن و حادثه یوز بېرگن جایگه یقین بیر ییرده گاز و نفت محصولاتینی تشووچی یوزلب باشقه تانکرلر هم توریبتی، که بو وضعیت یانغین نینگ کینگه‌ییشی حقیده گی تشویشلرنی جوده آشیریب یوبارگن اېدی. بو واقعه دن ترقه تیلگن ویدیو لرده، هیداوچیلرنینگ تشویش بیلن اۉز موترلرینی یانغین منطقه سیدن اوزاقلشتیریشگه حرکت قیلیاتگنلیکلری کۉرینگن.
بو اسلام قلعه گمرکی نینگ بونده ی بیر حادثه گه ایلک مرته گواه بولیشی اېمس. تخمیناً بېش ییل آلدین، ۱۳۹۹ ییل نینگ ۲۵ دلو کونی، عین شو گمرک نینگ عمومی توخته ش جاییده بیر کتته یانغین یوز بېریب، نتیجه ده یوزلب نفت محصولاتی تشووچی تانکر و موتر یانیب کېتگن و اونلب کیشی یره لنگن اېدی. او زمانده هم مقام لر واقعه ده جان تلفاتی یۉق لیگینی اعلان قیلگن اېدیلر.
۱۳۹۹ ییلده گی یانغین، چېگره نینگ نری تامانیده جایلشگن ایران نینگ اۉت اۉچیرووچی گروه لری یاردمی بیلن نظارت آستیگه آلینگن اېدی. اسلام قلعه گمرکی افغانستان نینگ ایران بیلن اینگ کتته و مهم تجارتی اۉتیش یۅلکلریدن بیری بولیب، هر کونی یوزلب یوک تشووچی موتر بو یۅل آرقه لی قتنه یدی.
بو یانغین نینگ سببی هلی رسمی روشده اعلان قیلینمه گن، لیکن اۉتمیشده گی شو کبی حادثه لر کۉپینچه خوفسیزلیک نقطه لرینی رعایت قیلمسلیک یا-ده تانکرلرده گی تخنیکی معمالر سببلی یوز بېرگن. طالبان مقام لری بو حقده تیکشیروو لر دوام اېتیاتگنینی ایتگنلر.
منبع: افغانستان اینترنشنال
🌐
