۸صبح روزنامه‌سی قولگه کېلتیرگن معلوماتلرگه کۉره، کابلده طالبان شهرداری‌سی نینگ ملکیت‌لر ریاستی نینگ بیر قطار ایشلاوچیلری، بیر یشیرین تجارت‌ده، یېرگه عاید محرم معلومات و آرشیو سندلرینی کمیشن کارلرگه ساتماقده. بو کیشی‌لر آرشیو دفترلری نینگ هر بیر صحیفه‌سینی فاش قیلگنلیکلری اوچون ایکّی مینگدن بېش مینگ امریکایی دالرگچه مبلغ آله‌دیلر.
منبع‌لر ۸صبح روزنامه‌سیگه ایتگن‌لر که، بو ایشلاوچیلر یېرنی ثبت قیلیش محرم دفترلریگه قول تاپیب، مالک‌لرنینگ مشخصاتی، حدود اربعه، یېرنینگ موقعیتی و تۉلاو تاریخچه‌سی کبی حساس معلوماتلرنی کمیشن کارلر اختیاریده قۉیه‌دیلر. کیین بو معلوماتلر سوداگرلر و یېر خریدارلریگه ساتیله‌دی. بعضی منبع‌لر ادعا قیلیش لریچه، بو معلوماتلردن جعلی ملکیت سندلرینی تیارلش اوچون هم فایده لنیله‌دی.
مالک‌لر، متقاضی‌لر، یېر قطعه‌لری، قیمت‌لر و تاپشیریش مرحله‌لری نینگ تۉلیق جزئیاتینی اۉز ایچیگه آلگن بو دفترلر، ملکیت‌لر ریاستی نینگ «اشد محرم» سندلریدن حسابلنه‌دی. اولرگه غیرمجاز قول تاپیش، جعل، فریبکارلیک و یېر ملکیت سابقه‌سیده قول اوریش اوچون زمینه یره تیشی ممکن.
گزارش‌ده بو ریاست نینگ ایکّی ایشلاوچیسی نینگ آتی کېلتیریلگن که بو جریانده قۉلی بار، لیکن اولرنینگ فکرینی آلیش ممکن بولمه‌گنلیگی اوچون، اولرنینگ کیملیگینی ذکر قیلیشدن تارتیلگن. بیر ایشانچلی منبع نینگ ایتشیچه، «هر یېر سندی نینگ اساسی و بنیادی شو کتاب‌لر دیر» و بو معلوماتلر سند تیارلش اوچون کیره ک بولگن همه مشخصاتنی اۉز ایچیگه آله‌دی.
بو منبع قۉشیمچه قیلدی که، بو ایکّی ایشلاوچی دفترلرنینگ هر صحیفه‌سینی عکس‌گه آلیش اوچون ۲٬۰۰۰ دن ۵٬۰۰۰ دالرگچه آله‌دیلر. باشقه بیر منبع هم تصدیقله‌دی که، عین شو معلوماتلر اساسیده یېر ملکیت نینگ جعلی سندلری تیارلنه‌دی و «بو قضیه نینگ آرقه سیده بیر بویوک و کینگ تجارت روان دیر.»
بو افشاگری، طالبان حکومتی نینگ کنترولی آستیده‌گی اداره لرده فساد بیر جدی تشویشگه ایلنگن بیر پیتده یوز بېرماقده. جورج دبلیو بوش انستیتوتی نینگ ۲۰۲۴ ییلده‌گی بیر تیکشیرووی کۉرسه تدی که، طالبان حاکمیتگه کېلگنیدن سۉنگ، دولتی قرارداد‌لر و ملکیت‌لرنی تاپشیریشده شفافیت نینگ یۉقلیگی، صلاحیت‌دن سوءاستفاده قیلیش اوچون زمینه یره‌تگن.
شونینگدیک، افغانستان اوچون برتلسمان بنیادی تحول شاخصی نینگ ۲۰۲۶ ییلده‌گی گزارشی بیان قیله‌دی که، طالبان مقام‌لری و اولرگه باغلیق شبکه‌لر آره‌سیده فساد، قانون حاکمیتینی ضعیف لشتیرگن و بو گروه نینگ نفوذلی مقام‌لری کۉپینچه جزادن معاف قالیوره دیلېر. بو موضوع طالبان حکومتی نینگ ساختاریده بیر سیستماتیک چالشنی کۉرسه ته‌دی.
منبع: روزنامه ۸صبح
🌐
