پاکستان دولتی تورکیه بیلن مناسبت‌لری تاریخیده بیرینچی مرته، بیر عیالنی انقره‌ده اۉز مملکتی نینگ ایلچیسی صفتیده تعیین قیلدی. پاکستانلیک تجربه لی بیر دیپلومات، آمنه بلوچ، دوشنبه کونی، ۱۱ عقربده، رسمی روشده اۉز ایشینی باشله‌دی.
تورکیه نینگ دیلی صباح روزنامه‌سی خبر بېریشیچه، خانم بلوچ اوچ اون ییلدن آرتیق دیپلوماتیک تجربه‌گه ایگه و بوندن آلدین پاکستان تشقی ایشلر وزیرلیگی نینگ سیاسی معینی کبی مهم سمت‌لرده فعالیت قیلگن. بو تعیینات پاکستان دیپلوماسیسیده عیاللر رولینی کوچه‌یتیریش یۉلیده مهم بیر قدم دیب سنله‌دی.
آمنه بلوچ اۉز حرفه‌ای فعالیتی دوامیده، دنمارک و سریلانکاده پاکستان نینگ دیپلوماتیک نماینده لیکلریده خدمت قیلگن و شونینگدیک چین نینگ چنگدو شهریده اوشبو مملکت نینگ سرقنسولی سمتینی هم ایگللگن.
بو تعیینات پاکستان و تورکیه نینگ سۉنگگی ییللرده سیاسی، اقتصادی، دفاعی و فرهنگی ساحه‌لرده ایکّی تامانلمه همکارلیکلرنی رواجلنتیریش اوچون کینگ سعی و حرکتلرنی باشله‌گن بیر پیتده یوز بېرماقده.
بو خبر پاکستان نینگ قۉشنی مملکتی افغانستانده طالبان حکومتی نینگ عیاللرگه قرشی جدی چېکلاولر قۉیگن بیر پیتده نشر ایتیلماقده. طالبان آلتینچی صنفتن یوقاری قیزلرنینگ تعلیمی و عیاللرنینگ عالی اۉقوو یورتلریده تحصیلی نی منع قیلگن و حتی کۉپلب خلق ارا تشکیلاتلرده ایشلاوچی عیال خادملرگه هم اۉز دفترلریگه باریشگه رخصت بېرمه‌یدی.
بو تضاد ایکّی قۉشنی مملکتده عیاللرنینگ فرقلی وضعیتینی یوریتماقده؛ پاکستان کلیدی ساحه‌لرده عیاللرنی کوچه‌یتیریش اوچون قدم تشله‌یاتگن بیر حالده، افغانستانده‌گی عیاللر اۉز اساسی حق لریدن محروم بۉلیشگه روپه‌رو دیرلر.
منبع: دیلی صباح
🌐
