قندوز ولایتیده‌گی محلی منبع‌لرنینگ ایتشیچه، طالبان کوچلری بو ولایت نینگ آقتاش تومنیده بش قومی بویوکنی قولگه آلگنلر. بو کیشیلر آلتین کان‌لرینی اۉزباشیمچه‌لیک بیلن قازیب آلیشگه اعتراض قیلگنلری و مملکت تشقریسیده‌گی رسانه‌لرگه ویدیو یوبارگنلیک عیبی بیلن قولگه آلینگنلر.
منبع‌لرنینگ سۉزلریگه کۉره، قولگه آلینگنلردن ایکّی کیشی طالبان تامانیدن جدی یامان معامله قیلینگن. بو قولگه آلیشلر، آقتاش تومنی نینگ «بند برق» منطقه‌سی نینگ اونلب اهالیسی طالبان نینگ قراردادی شرکتلری تامانیدن آلتیننی غیراصولی قازیب آلیشگه قرشی اعتراض قیلگندن سۉنگ یوز بیرگن.
اعتراضچیلرنینگ ایتیشیچه، بو شرکتلر یشاش اویلری، یۉللر و برق ستون‌لری یقینیده چوقور قودوقلر قازگنلر که اگر سیلاب یوز بېرسه، قشلاق و عمومی زیربنالرنینگ بوزیلیش خطری موجود.
محلی اهالی شونینگدیک قوراللی طالبان اعضالری آلتین کان‌لرینی کنترولگه آلگنلرینی و فقیر ایشچیلرنی قازیب آلیش جاییدن چیقاریب یوباریاتگنلرینی ادعا قیلماقده‌لر. اولرنینگ ایتشیچه، طالبان هر بیر آلتین قازیب آلیش قودوغینی قازیش اوچون خلقتن مجبوراً اوچ مینگ افغانی پول آلماقده.
منبع‌لرنینگ ایتیشیچه، دشت ارچی اوچون طالبان ولسوالی زلمی اسامه که آقتاش قشلاغی نینگ اهالیسی دیر، خلقی تهدید قیلگن که اگر بو پولنی تۉلمه سه‌لر، منطقه‌دن چیقاریب یوباریله‌دیلر.
بو بحرانلر طالبان اورته‌سیده ایچکی اوروشگه هم سبب بۉلگن. منبع‌لرگه کۉره، دوشنبه کونی کېچقورون زلمی اسامه‌گه باغلیق کیشیلر و آقتاشده‌گی طالبان امنیه قوماندانی شریف‌الله متوکل نینگ آدم‌لری اورته‌سیده، آلتین قازیب آلیش ساحه‌لرینی بۉلیش و کنترول قیلیش اوستیده قوراللی اوروش یوز بیرگن. ایتیلیشیچه، آقتاشده‌گی طالبان ولسوالی اوروشنی توگه تیش اوچون واسطه چیلیک قیلگن.
منبع: محلی منبع‌لر
🌐
