نیویارکده بیر فدرال قاضی بیر حکم صادر قیلیب، آمریکا دولتی نی افغان مهاجرلرینی پاکستانگه چیقاریشدن موقت شکلده منع قیلدی. «ای بی‌سی نیوز» شبکه‌سی نینگ گزارشیگه کۉره، بو حکم سه‌شنبه کونی (۱۲ عقرب) صادر ایتیلگن و کیلگوسی شنبه کونگچه اعتبارلی دیر.
بو حکم نیویارکده‌گی امریکا قۉشمه ایالتلری منطقوی محکمه‌سی قاضیسی والری کاپرونی تامانیدن، اوشبو هفته‌ده اونلب افغان مهاجرینی چیقاریش ریجه لشتیریلگنی حقیده‌گی گزارشلر ترقه لگنیدن سۉنگ، صادر قیلیندی. بو قانونی اقدام مهاجرلرنی حمایه قیلووچی گروهلر و قولگه آلینگن کیشیلرنینگ عایله‌لری تامانیدن خواطرلر آرتگنی آرتیدن عملگه آشیریلدی.
امریکا دولتی نینگ وکیللری محکمه‌ده تصدیقله‌دیلر که، بو مملکت نینگ مهاجرت و گمرک اداره‌سی حداقل هفته نینگ آخریگچه افغانستان یا پاکستانگه مهاجرلرنی چیقاریش اوچون هیچ بیر چارتر یا تجاری پروازنی ریجه لشتیرمه‌گن. بو بیانات محکمه‌گه تقدیم ایتیلگن سندلر چیقاریش پروازی نینگ یقین ایکنینی کۉرستگنیدن سۉنگ بیریلدی.
«افغان ایواک» نی اۉز ایچیگه آلگن مهاجرلرنی حمایه قیلووچی نهادلر، چیقاریلیش خطریده بۉلگن کیشیلر آره‌سیده، افغانستانده امریکالی کوچلر بیلن همکارلیک قیلگنلرنینگ یقینلری بۉلیشی ممکنلیگیدن خواطر بیلدیرگن اېدیلر. بو کیشیلرنی چیقاریش و اولرنی طالبانگه تاپشیریش اولرنینگ حیاتی نی خطرگه سالیشی ممکن.
آلدین گزارش بېریلگن اېدی که آمریکا دولتی لوئیزیاناده‌گی بیر نظارتخانه‌ده سقلنه‌یاتگن ۱۵۰ دن ۲۰۰ گچه افغان مهاجرنی بیر چارتر پرواز بیلن پاکستانگه و سۉنگره قوروقلیک یۉلی آرقهلی افغانستانگه انتقال بیریشنی نیت قیلگن. «افغان ایواک» نهادی نینگ رئیسی شان ون دایور، بو حکم نینگ بیر «نفس آلیش مهلتی» ایکنینی و «نهایی حل» ایمسلیگینی ایتدی.
او، سابق حربیلر، مهاجرلر حقوقی فعاللری و کانگرس اعضالری نینگ عمومی باسیمی دولتنی اۉز پازیتسییاسیدان چېکینیشگا ماژبور قیلگنینی قۉشیمچه قیلدی. جناب ون دایور تأکیدله‌دی: «بیر هفته آلدین، اوچاق چارتر قیلینگن اېدی، لیکن بوگون دولت بیر فدرال قاضیگه بونده‌ی پرواز یۉقلیگینی ایتدی. بو تصادفی بۉلمه‌دی.»
امریکا نینگ مهاجرت و گمرک اداره‌سی سۉزچیسی احتمالی چیقاریش عملیاتلری نینگ جزئیاتی حقیده فکر بیلدریشدن باش تارتدی. بو موقت حکم، کابل قوله گنیدن سۉنگ آمریکاگه پناه کیلتیرگن مینگلب افغانلرنینگ تقدیرلری هلی هم نامعلوم بۉلیب قالگن بیر پیتده صادر ایتیلماقده.
منبع: ای بی‌سی نیوز
🌐
