بیرلشگن ملتلر تشکیلاتی نینگ توسعه برنامه‌سی (یو‌ان‌دی پی) افغانستان نینگ ییلده ۲۲۰ گیگاواتدن کۉپراق قویآش برقی ایشلب چیقاریش ظرفیتیگه اېگه ایکنینی معلوم قیلدی. اوشبو نهاد سه‌شنبه کونی (۱۲ عقرب) بیر ویدیویی گزارشده، بو کتته پوتانسیل مملکتنی منطقه‌ده تازه انرژی مرکزیگه ایلنتیریشی ممکنلیگینی ایتدی.
بو ظرفیتنی یخشیراق توشینیش اوچون، یو‌ان‌دی پی ۲۲۰ گیگاوات برق بریتانیا کبی بیر کتته مملکت نینگ بوتون برق احتیاجینی تأمینلش اوچون ییترلی ایکنینی ایضاحله‌دی. شونگه قره‌می، افغانستان حاضرده اۉز ضرور برقی نینگ ۸۰ فایزدن کۉپراغینی قۉشنی مملکتلردن وارد قیله‌دی که بو مملکت اوچون ییلده ۲۸۰ میلیون دالردن آرتیق خرجتگه سبب بۉله‌دی.
ایران، ترکمنستان، تاجیکستان و اۉزبېکستان کبی مملکتلردن وارداتی برققه بو قدر باغلیق‌لیک، افغانستاننی سیاسی و اقتصادی تېبره نیشلرگه قرشی ضعیف قیلماقده. بوندن تشقری، مملکت نینگ کۉپلب قیشلاق منطقه‌لری هلی هم عمومی برق شبکه‌سیگه اولنمه‌گن و میلیونلب کیشی پایدار انرژیگه اېگه ایمس.
بیرلشگن ملتلر تشکیلاتی نینگ توسعه برنامه‌سی ایتشیچه، ۲۰۲۱-ییلدن بویان، اۉز شریکلری بیلن همکارلیکده، ۵.۵ میلیون دن آرتیق افغان وطنداشی نینگ تازه و ارزان انرژیگه ایریشیشینی تأمینله‌گن. شونده‌ی بۉلسه-ده، بو نهاد مملکت نینگ قویآش پوتانسیلیدن تۉلیق فایده لنیش اوچون انچه کۉپراق سرمایه و سعی-حرکتلرگه ضرورت بارلیگینی تأکیدله‌یدی.
کتته شهرلرده هم انرژی وضعیتی رضایت‌بخش ایمس. شهر اهالی دواملی روشده برق نینگ اوزاق مدتلی اوزیلیشیدن، خصوصاً ایسیق و ساووق فصللرده، و شونینگدېک اونینگ ناعادلانه ترقه تیلیشیدن شکایت قیله‌دیلر. بو معمالر کونده‌لیک حیات و اقتصادی فعالیتلرگه منفی تأثیر کۉرستماقده.
شو مناسبت بیلن، بیرلشگن ملتلر تشکیلاتی نینگ توسعه دفتری یقینده «انرژی هفته لیگی» نی اۉتکزیشنی اعلان قیلدی. بو تدبیرده، افغانستان نینگ انرژی بولیمی ایشچیلری مملکتده انرژیگه ایریشیش وضعیتی نی یخشی لش یۉلیده‌گی قیینچیلیکلر، فرصتلر و حل یۉللری حقیده بحث و فکر المشیش اوچون ییغیلدیلر.
منبع: بیرلشگن ملتلر تشکیلاتی نینگ توسعه برنامه‌سی (یو‌ان‌دی پی)
🌐
