یاورۆپا ایتفاقی کینگشی اوکراین کوچلری نی قوللب-قوتلش بویینچه حربی تعلیمات مسوولیتی نی ینگیلب، اونی ۲۰۲۸-ییل ۱۵ نوامبرگچه اوزایتیردی. بو قرار اوکراین قوراللی کوچلری نینگ مدافعه قابلیتی نی آشیریش مقصدی ده قبول قیلیندی.
یاورۆپا ایتفاقی کینگشی نینگ رسمی بیاناتیده کیلیشیچه، اوشبو ینگی باسقیچ اوچون تخمیناً ۳۰۰ میلیون یورو بودجه اجره‌تیلگن. بو قرار تعلیمات پروگرامی بویینچه سونگی استراتژیک قیته کۉریب چیقیشدن سۉنگ آلیندی.
یاورۆپا ایتفاقی اوکراین ایچیده مستقیم دفتر آچیب و حضور سقلش آرقه لی قرارگاه قورماقچی. بو اقدام اوکراین حربی رسمیلری، قوراللی کوچلری و خلق ارا شریکلر بیلن تینگ هماهنگلیک اۉرنه‌تیش اوچون یۉلگه قوییلماقده.
رسمیلر گه کۉره، بو هماهنگلیکلر حربی تعلیماتلرنی نبرد خطوطی نینگ انیق احتیاجلری اساسیده ینگیلش اوچون یاردم بیره‌دی. ینگی توزولیشده اوروش تجربه‌لریدن فایده‌لنیش و اوکراین مدافعه تیزیمینی مستحکملش نظرده توتیلگن.
یاورۆپا ایتفاقی هیئتی بیریشمیش ایالتلر، بریتانیا، کانادا، ناروی و شونینگدېک ناتو قوماندانلیگی بیلن همکارلیکنی دوام ایتتیره‌دی. اوشبو مسوولیت دستلب ۲۰۲۲-ییل اکتبر آییده کی‌یف بیلن کیلیشوو اساسیده باشلنگن اېدی.
یاورۆپا ایتفاقی اۉز عضو مملکتلری ده شو واقتگچه ۱۰ میندن آرتیق اوکراین عسکرینی تربیه‌لگن. اوشبو حربی و مدافعه پروگرامی نینگ برچه خراجتلری یاورۆپا تینچلیک صندوقی تامانیدن تامینلنه‌دی.
منبع: یاورۆپا ایتفاقی کینگشی
🌐
