اروپا اتفاقی بیر بیانیه صادر ایتیب، پاکستان نینگ کنر و هلمند ولایتلریده گی سونگگی هوا هجوملریده تینچ اهالی نینگ اۉلیمی اوچون تأسف بیلدیرر ایکن، طالبان حکومتی مقام لریدن هراس افکن گروه لرگه قرشی چاره کۉریشنی سۉره دی.
جمعه کونی نشر ایتیلگن بو بیانیه ده کېلیشیچه، طالبان حکومتی «افغانستانده یاکه بو مملکت توپراغیدن فعالیت قیله دیگن» گروه لرگه قرشی جدی و مؤثر چاره لر کۉریشی کېره ک.
اروپا اتفاقی شونینگدېک، طالبان و پاکستان مقام لریدن اۉزینی توتیش بیلن، تنش لرنینگ آرتماسلیگینی آلدی آلر ایکن، موجود معمالرنی حل قیلیش اوچون صحبتگه یوز کېلتیریشلرینی سۉره دی. بو بیانیه اختلافلرنی تینچ یл بیلن حل ایتیش نینگ اهمیتینی تاکیدله دی.
بو خلق ارا تشکیلات برچه تامانلردن خلق ارا بشردوستانه قانونلرگه حرمت قیلیشلرینی و توقنشوولر جریانیده تینچ اهالینی محافظت قیلیشلرینی طلب قیلدی. بو درخواست پاکستان هجوملریده تینچ اهالی تلفاتلری حقیده گی گزارشلر آرتیدن یوز بیردی.
بو بیانیه کابل و اسلام آباد آره سیده افغانستان توپراغیده تحریک طالبان پاکستان (تی تی پی) کبی گروه لرنینگ حضوری باره سیده گی تنشلر آرتگن بیر شرایطده صادر ایتیلماقده. پاکستان بو گروه لرنینگ افغانستاندن پاکستانده هجوملرنی ریجه لشتیریش اوچون فایده له نیشینی ادعا قیلماقده، بو ادعانی طالبان حکومتی همیشه رد ایتیب کیلگن.
پاکستان نینگ افغانستان توپراغی ایچیده گی سونگگی هوا هجوملری طالبان حکومتی نینگ تیز عکس العملیگه دوچ کیلدی و اولر اونی افغانستان ملی حاکمیتینی پامال ایتیش دیب اتدیلر. خلق ارا جمعیت بو تنشلرنینگ آرتماسی منطقه ده کوپراق بی ثباتلیککه سبب بولیپ قالیشیدن خواطرده.
اروپا اتفاقی و باشقه خلق ارا اویینچیلر وضعیتنی دقت بیلن کۉزه تیب بارماقده و هر ایکّی تاماندن تنشلرنی کمه یتیریش و بیر پایدار ییچیم تاپیش اوچون دیپلوماتیک یۉللر آرقه لی سعی و حرکت قیلیشلرینی طلب قیلماقده.
منبع: اروپا اتفاقی بیانیه سی
🌐
