امریکا قۉشمه ایالتلری نینگ پرېزیدنتی دونالد ترامپ، روسیه پرېزیدنتی ولادیمیر پوتین و چین پرېزیدنتی شی جین‌پینگ بیلن تاریخی اوچ تامانلمه اوچره‌شو اوچون آسیا بۉیلب بېش کونلیک سفری نینگ بیرینچی باسقیچینی باشله‌دی.

آق اوی اعلام قیلدی که، دونالد ترامپ یېتکچیلیگیده‌گی امریکا هیأتی دوشنبه کونی آقشامیده آسیا تامان حرکت قیلگن. ترامپ دستلب فیلیپین نینگ پایختی مانیل شهریگه باریب، جنوب‌شرقی آسیا اولکه‌لری نینگ ییغینیده اشتراک اېته‌دی.

امریکا پرېزیدنتی مذکور سفر دوامیده جاپان، هندوستان و استرالیا یېتکچیلری بیلن هم اوچره‌شیب، هیند و تینچ اوقیانوسی منطقه‌سی نینگ خوفسیزلیگی خصوصیده سوزلشه‌دی. شونینگدیک، تایلند بیلن بیر سودا بیتیمنی امضالش هم بو سفر ریجه‌سیگه کیریتیلگن.

ترامپ مانیل‌دن سونگ، آسیا و تینچ اوقیانوسی اقتصادی همکارلیک ییغینیده قتنه‌شیش مقصدیده چین نینگ شنژن شهریگه باره‌دی. پنج‌شنبه کونیگه مۉلجللنگن اوشبو تاریخی اوچ تامانلمه ییغین، ترامپ سفری نینگ اېنگ مهم قسمی حسابلنه‌دی.

بو کۉریشوو اوشبو اوچ بویوک قدرت یېتکچیلری نینگ بیرینچی اورتاق ییغینی دیر. یادرولیک قوراللرنی نظارت قیلیش و ایران اوروشی مهم مذاکره موضوعلریدن بۉلیشی معلوم قیلینگن. ترامپ اوکراین اوروشینی هم مطرح قیلیشینی ایتگن، بیراق بوندن آلدین امریکالیک رسمیلر بو موضوع رسمی ریجه‌ده یۉقلیگینی معلوم قیلگن اېدیلر.

امریکانینگ «ای‌بی‌سی» ترماغی ترقه‌تگن معلوماتیگه کۉره، ترامپ سفرگه چیقیشدن آلدین چینده شمالی کوریا یېتکچیسی کیم جونگ‌اون بیلن هم کۉریشیشی ممکنلیگینی بیلدیردی، اما بو قرار چین پرېزیدنتی شی جین‌پینگگه باغلیق اېکنینی و حتمی اېمسلیگینی قید اېتگن.

منبع: ای‌بی‌سی ترماغی

🌐

Author