د طالبانو حکومت د مالیې وزارت اعلان کړی دی چې د افغانستان او ایران ترمنځ د اسلام‌قلعه ګمرک فعالیتونه به د راتلونکې شنبې له ورځې څخه ۲۴ ساعته شي.

دغه پرېکړه د طالبانو حکومت د مالیې د وزیر ملا محمد ناصر او د ایران د اقتصاد او دارايۍ د وزیر سید علي مدني‌زاده ترمنځ د لیدنې پر مهال شوې ده.

د دغه وزارت د اعلامیې له مخې، دواړو خواوو د بندرونو د ۲۴ ساعته کولو ترڅنګ، د ګمرکي سیسټمونو د نښلولو، د باروړونکو موټرو د تګ‌راتګ د ډېرېدو، د خاک‌پولۍ د لغوه کولو او د قاچاق د مخنیوي په اړه هم هوکړه کړې ده.

د طالبانو حکومت د مالیې وزیر په مشرۍ یو پلاوی د سوداګریزو او ترانزیټي اړیکو د پراختیا په موخه ایران ته تللی او هلته یې له بېلابېلو ایراني چارواکو سره لیدلي دي.

له دې مخکې طالبانو او ایران د نیمروز ولایت د ورېښمو پله او د ایران د سیستان او بلوچستان د میلک ترمنځ هم تګ‌راتګ ۲۴ ساعته کړی و.

سرچینه: د طالبانو حکومت د مالیې وزارت

🌐

Author