د اسټرالیا د کرکټ پخواني لوبغاړي کامرون بنکرافټ څرګنده کړې چې په ۲۰۱۸ کال کې د سویلي افریقا پر وړاندې د توپ خرابولو په پېښه کې یوازې درې لوبغاړي نه، بلکې ټول ټیم شامل و. هغه وویل چې د اتو کلونو لپاره یې د ټولې لوبډلې پیټی پر خپلو اوږو بار کړی و.
د خپرو شویو معلوماتو له مخې، بنکرافټ اعتراف کړی چې د اسټرالیا د کرکټ بورډ په رسمي څېړنو کې یې بشپړ حقیقت نه و ویلی. هغه د خپلو نورو ملګرو او د څېړنو د ساتنې په موخه ځینې مهم جزییات او د نورو لوبغاړو خبرتیا پټه ساتلې وه.
دا څرګندونې وروسته له هغې کېږي چې د اسټرالیا د کرکټ بورډ اجرايوي رییس ټاډ ګرینبرګ اعلان وکړ چې په ۲۰۱۸ کال کې د سویلي افریقا په سفر کې ټولو شاملو لوبغاړو او کارکوونکو ته د خبرو یو ازاد فورم جوړوي. بنکرافټ له دې پرېکړې هرکلی کړی او ویلي یې دي چې په دغه فورم کې به برخه واخلي.
بنکرافټ زیاته کړه چې د اسټرالیا د اوسني کپتان پیټ کامینز وروستیو خبري څرګندونو دی سخت ناهیلی او یوازې کړ. د ده په خبره، کامینز په رسنیو کې هغه څه نه دي ویلي چې دوی په سویلي افریقا کې په حقیقت کې تجربه کړي وو.
هغه د عثمان خواجه ژوندلیک ته په اشارې وویل، له هغه وخته چې په ۲۰۱۷-۲۰۱۸ کلونو کې لوبډلې ته راغلی و، د توپ اړول او خرابول په یوه عادي چاره بدل شوي و او لوبغاړو ته لارښوونه کېده چې د توپ پر درز فشار راوړي څو توپ رېورس سوېنګ شي.
بنکرافټ څرګنده کړه چې د پورټ الیزابیت په دویم ټیسټ کې د چای د وقفې پر مهال، کله چې سیالې لوبډلې ۱۵۳ منډې کړې وې، په لوبډله کې فشار زیات شو او د غیرقانوني چارو پرېکړې وشوې. نوموړي وویل چې مسلکي ژوند یې پای ته رسېدلی او نور د حقیقت پټول نه غواړي.
سرچینه: د کامرون بنکرافټ څرګندونې
🌐