افغانستان بۉییچه سوئیس انکشافی همکارلیک اداره‌سی اوشبو مملکت نینگ طالبان حکومتی بیلن مناسبتی فقط اطراف موحیطنی سقلش، قیتووچیلرنی قوللب-قوتلش و ماین تازه‌لش کبی تخنیکی ساحه‌لرده چېکلنگنینی معلوم قیلدی. سوئیس‌اینفو نشر نینگ معلوماتیگه کۉره، سوئیس اۉز بشردوستانه یاردملرینی طالبان بیلن مستقیم همکارلیکسیز و محلی مسووللرگه پول بېرمسدن اولشماقده.

سوئیس وکیللیگی باشلیغی اریک مارکلی و اونینگ اۉرینباسری پاملا استاتاکیس سوئیس‌اینفوگه بېرگن صحبتیده بشری قیینچیلیکلر حقیده سۉزلدیلر. مارکلی نینگ ایتیشیچه، کابلده‌گی سوئیس اداره‌سی ۲۰۲۵-ییل مارچ آییدن بېری ۵ سوئیسلیک و ۱۰ افغان کارمند بیلن فعالیتی نی دوام اېتدیرماقده.

سوئیس نماینده‌سی کابلده ایاللر، قیزلر و بیجاشگن اهالی بشردوستانه یاردمگه اېنگ کۉپ نیازمند ایکنینی معلوم قیلدی. پاملا استاتاکیس هم افغانستانده بۉلیش محلی نیازلرنی تۉغریدن-تۉغری تثبیت قیلیش و لایحه‌لرنی یخشیراق نظارت قیلیشگه امکان بېریشینی اورغوله دی.

معاون نینگ سۉزلریگه کۉره، ایاللر ساغلیقنی سقلش، باشلانغیچ مکتبلر و خصوصی تجارتلر بۉلیمیده ایشلب کېلماقده‌لر. او سوئیس قندهار ولایتیده ایاللر پناه جایینی و ایال ژورنالیستلر اوچون آنلاین اۉقوو دستوری نی مالی جهت‌دن قوللب-قوتله‌یتگانینی تیلگه آلدی.

سوئیس مسووللری خلق‌ارا تشکیلاتلر، اینیقسه امریکا خلق‌ارا رواجلنیش اداره‌سی نینگ چیقیشی افغانستان درمانچیلیک تېزیمیگه کتته ضربه بېرگنینی بیلدیردیلر. اولر لایحه‌لر عملگه آشیریلیشیده رسمیی طالبان بیلن فقط تخنیکی مساله‌لر بۉییچه رخصت آلینیشینی، بیراق طالبانگه هیچ قنده‌ی مالی تۉلوو بېریلمسلیگینی بیلدیردیلر.

سوئیس اۉز دسته‌کلرینی بیرلشگن ملتلر تشکیلاتی نینگ اداره‌لری، قیزل خاچ خلق‌ارا کمیته‌سی و محلی تشکیلاتلر آرقه‌لی ترقه‌تماقده. اریک مارکلی سوئیس قریب ۲۵ میلیون سوئیس فرانکی یا ۲۹.۶ میلیون دالر یاردم اجره‌تیب، افغانستان نینگ اېنگ بویوک کمکچیلریدن بیری بۉلیب قالگنینی ایتدی.

منبع: سوئیس‌اینفو

🌐

Author