بیرلشگن ملتلر تشکیلاتی نینگ قاچاقینلر بوییچه عالی کمیشنرلیگی، دنیا بویلب ۹۰ میلیونگه یقین مجبوراً آواره بولگن انسان کوچلی اقلیمی خوف-خطرلر بولگن اولکه‌لرده یشه‌ماقده‌لیگینی و افغانستان هم اوشبو مملکتلر قطاریگه کیریشینی معلوم قیلدی.
اوشبو اداره نینگ ینگی گزارشیگه کوره، جهان بویلب قاچاقینلر نینگ قاریب اوچدن تورت قسمی قورغاقچیلیک، سوو تاشقینلری و قتیق ایسیق اودیده قالگن؛ بو وضعیت اساسی صورتده افغانستان و بنگله‌دیشده کوپراق کوزگه تشلنه‌دی.
گزارشده قید ایتیلیشیچه، افغانستانده اقلیم بحرانی آواره‌لر نینگ حیاتینی جدی قیینچیلیککه روپه‌رو قیلگن و اولر نینگ اوز توغیلگن ییرلریگه قیتیش پروسه‌سینی خسته‌لنتیرگن.
اداره نینگ اورغولشیچه، اوروشلر و ثباتسیزلیککه دوچ کیلیب قالگن اولکه‌لرگه اقلیم اوچون اجره‌تیلگن یاردم پولی نینگ فقط ۱۰ فایزی یېتیب باره‌دی. شونینگدیک رویترز بیرلشگن ملتلر تشکیلاتی تیکشیروویگه تیه‌نیب یازیشیچه، ریواجلنه‌یاتگن اولکه‌لر ییلیده ۳۰۵ میلیارد دالر مالیه همکارلیککه محتاج دیر.
شونده‌ی بیر حالده، بیرلشگن ملتلر تشکیلاتی نینگ بشری یاردم‌لرنی هماهنگ قیلووچی دفتری (اوچا) معلوم قیلیشیچه، افغانستان نینگ کمیده ۱۸ ولایتی اوتکیز اقلیمی خطر خطیده توخته‌گن و ۱۶ میلیونگه یقین اهالی ساغلام ایچیم‌لیک سووگه ضرورت سیزماقده دیر.
یوناما و خلق‌ارا منبعلرنینگ یازیشیچه، کابل و باشقه شهرلرده ییر آستی سوولری نینگ چوقورلب کیتیشی همده توخته‌وسیز قورغاقچیلیک، یورت بویلب آواره‌لیک، ساغلیق و اوزوق-آوقات خسته‌لیکلرینی چوقورلشتیرگن.
منبع: بی بیرلشگن ملتلر تشکیلاتی نینگ قاچاقینلر کمیشنرلیگی و اوچا
🌐
