نیویارک‌تایمز روزنامه‌سی نینگ سابق باش یازووچیسی ربکا بلومنستاین، امریکا کوچلری کابلدن چیقیب کیتیش جریانی اۉتکزیلگن پیتده جو بایدن حکومتی اوشبو رسانه‌نینگ ۱۲۴ افغان خادمی و اولر نینگ عایله‌لریگه ویزه بېریش و انتقال قیلیشده هیچ قنده‌ی همکارلیک قیلـمه‌گنینی معلوم قیلدی.
اونینگ سۉزلریگه کۉره، نیویارک‌تایمز قطر، مکسیکو و بیر قطار تشکیلاتلر نینگ یاردمی بیلن اۉز خادملری و عایله‌لرینی افغانستاندن چیقاریب، قۉشمه ایالتلرگه ییتکیزیشگه موفق بۉلگن.
بلومنستاین خانیم بیر ییغیندا چیقیش قیلیب، امریکا کوچلری کابلدن چیقیشی بیلن نیویارک‌تایمز نینگ محلی خادملری آغیر خوفسیزلیک وضعیتیگه توشگنینی و بعضیلری ایککی شبانه‌رۉز کابل هوایی میدانی یقینیده کوچه‌لرده کوتگنلرینی بیلدیردی.
اونینگ قۉشیمچه قیلیشیچه، طالبان کوچلری نینگ تېز آلدینگه باریشی و کابل نینگ تۉساتدن قوله‌شی خادملرنی سرسام قیلیب قۉیگن بۉلیب، اولرگه شخصیی بویوملرینی ییغیش و عایله‌لری بیلن خیرلشیش اوچون فرصت قالمس اېدی.
امریکاگه بارگن اوشبو خادملر نینگ عایله اعضالریدن بیری بیرینچی مرتبه کوچیب چیقیشده مهم بویوملرینی آلیب میدانگه باریش اوچون یالغوز ۳۰ دقیقه وقتی بۉلگنینی بیان قیلدی.
ربکا بلومنستاین و اونینگ همکار قلمکشی دیانا کپ بیرگه یازگن کتابیده اۉز خادملرینی قطر و مکسیکو آرقه لی امریکا نینگ تگزاس ایالتیگه قره‌شلی هیوستون شهریگه انیق قۉندیرگنلرینی حکایه قیلگنلر.
هاروارد پوهنتونی نشریه‌سی معلوماتیگه کۉره، امریکاده حکومت نینگ ییتریلی حمایتی بۉلمه‌گن بیر شرایطده، عامه خذمت گروهلری و محلی فدایی پناه ایستاوچیلرگه یاردم بېریشده کتته رول اۉینه‌گن.
منبع: هاروارد پوهنتونی نشریه‌سی
🌐
