هرات ولایتیده طالبان خوفسیزلیک مسئوللری افغانستان دن تشقریگه قریب ۱۰۰ کیلوگرام عیاللر ساچینی قاچاق قیلیش نینگ آلدی آلینگنینی و بو بۉییچه ایککی کیشی قولگه آلینگنینی معلوم قیلدی.
هرات پولیسی نینگ سوزلاوچیسی مسعود حسینی دوشنبه کونی بیلدیردی که، اوشبو کیشیلر قوماندانی نینگ شاهراه کندکی کوچلری تامانیدن اوشلنگن. اونینگ ایتیشیچه، قولگه آلینگنلر دستلبکی تېکشیریشلردن سونگ عدلی و قضایی اداره‌لرگه تاپشیریله‌دی.
طالبان پولیسی نینگ اعلامیه‌سیده ساچلر قیسی ولایتلردن ییغیلگنی و قیسی مملکتگه قاچاق قیلینماقچی بۉلگنی انیقلنمه‌گن.
عیاللرنینگ طبیعی ساچی کۉپینچه پاکستان و چین کبی تشقی بازارلرده یاساما ساچلر (پروک) یسش اوچون ساتیله‌دی. اولرنینگ بهاسی اوزونلیگی، رنگی و کیفیتیگه کۉره بېلگیلنه‌دی.
طالبان حکومتی انسان ساچینی ساتیب آلیش و ساتیگنی منعه قیلگن و اونی شرعی نقطه نظردن ناروا حسابله‌یدی. بیراق فرانس پرس آژانسی نینگ راپورتیگه کۉره، قطار افغان عیاللری اقتصادی قیینچیلیکلر طفیلی اۉز ساچلرینی ساتیب کون کیچیرماقده.
کابلده یشاوچی ۲۸ یاشر فاطمه اوشبو آژانسگه ایتیشیچه، حیات طلباتی اوچون هر ۱۰۰ گرام ساچینی قریب ۳ دالرگه ساته‌دی. شونینگدېک هراتده یشاوچی ۴۵ یاشر سیمین‌گل هم نان ساتیب آلیش اوچون اۉزی و قیزلری نینگ ساچینی ۳۰۰ افغانیگه ساتگنینی بیلدیرگن.
بوندن آلدین جاری ییل نینگ ۲۷ میزانیده طالبان هرات نینگ گذره تومنیده ۸۰۰ کیلوگرام مصادره قیلینگن انسان ساچینی یېقتیریب کویدیرگن اېدی.
منبع: فرانس پرس آژانسی و طالبان محلی مسئوللری
🌐
