د افغانستان لپاره د برتانیا ځانګړي استازي ریچارډ لینزي پاکستان ته د خپل سفر پر مهال د طالبانو له سفیر سردار احمد شکیب سره لیدلي دي. په دې ناسته کې د سیمې پر امنیتي مسایلو او پر افغان ښځو او نجونو د طالبانو د سیاستونو پر اغیزو خبرې وشوې.
لینزي دغه راز له خپل پاکستاني سیال سره هم وکتل ترڅو د امنیتي اندیښنو او ترهګریزو بریدونو په اړه نظر تبادله کړي. که څه هم برتانیا طالبان په رسمیت نه پیژني، خو د بشري مسایلو لپاره یې خپلې اړیکې ساتلې دي.
د برتانوي دیپلومات لخوا د «طالبانو سفیر» اصطلاح کارول د څیړونکو پام ځانته اړولی دی. د طالبانو د بهرنیو چارو وزارت تل ټینګار کوي چې د نړیوالو فشارونو سره سره، له بیلابیلو هیوادونو سره پراخې غیر رسمي اړیکې لري.
د برتانیا ځانګړي استازي په اسلام اباد کې د طالبانو له سفیر سره وکتل
