افغان خبریالې فرحناز فروتن د متحده عربي اماراتو پر وروستیو سیاستونو کلکه نیوکه کړې او هغه یې له تضادونو ډک بللي دي. هغې په خپله ایکس پاڼه لیکلي چې ابوظبي له یوې خوا له طالبانو سره اړیکې عادي کوي، او له بلې خوا هغې ښځینه فعالې ته جایزه ورکوي چې د طالبانو پر ضد مبارزه کوي.
فروتن همدارنګه د ولسمشر غني د ملي امنیت له پخواني سلاکار سره د اماراتو پر قرارداد هم ګوته نیولې ده. هغې پوښتلي چې دا څنګه ممکنه ده چې یو هېواد دې په یو وخت کې له طالبانو، د هغوی له مخالفینو او د تېر حکومت له چارواکو سره جوړ جاړی وکړي؟ دا کړنې یې حیرانوونکې بللې دي.
په دغه پوسټ کې فرحناز فروتن د ښاغلي آثار حکیمي او مېرمن یفتلي له پلویانو پوښتلي چې دوی د دې موضوع په اړه څه نظر لري. د هغې دې څرګندونو په ټولنیزو رسنیو کې تود بحث راپورته کړی چې آیا بهرني هېوادونه د افغانستان په اړه رښتینې تګلاره لري که یوازې خپلې ګټې لټوي.
