پاکستان نینگ سند ایالتی نینگ عالی محکمه سی کراچی ده گی جناح سند طبی دانشگاهیگه افغان دانشجو لرگه اۉز صنف لریده حاضر بۉلیش و تحصیل لرینی دوام بېریشگه رخصت بېریشنی بویردی. بو محکمه شونینگدیک بو دانشجو لرنینگ یاتاقخانه لرده قالیشی اوچون موقت حمایه نی هم اوزه‌یتیردی.
بو حکم، پاکستان نینگ طبی و دندانپزشکی کینگشی (PMDC) نینگ سپتامبر آیی نینگ بیرینچی کونیده گی قراریگه قرشی افغان دانشجو لرنینگ شکایتی آرتیدن صادر بۉلدی. اوشبو قرار طبی دانشگاه لرگه افغان دانشجو لرنی اۉز مملکتلریگه قیته یوباریشنی بویرگن اېدی. دانشجو لرنینگ وکیل لری، دانشگاه نینگ محکمه نینگ آلدینگی تعلیق قراریگه قره مسدن، دانشجو لرنینگ قتنه‌شیشیگه تۉسقینلیک قیلگنینی ایتدیلر.
سه شنبه کونی بۉلگن جلسه ده، دانشجو لرنینگ وکیل لری، دانشگاه نینگ دانشجو لرنینگ بیومتریک کیریشینی توخته تیب قۄیگنی و اولرنی یاتاقخانه لردن چیقریش اوچون اقدام قیلگنینی استدلال قیلدیلر. محکمه، دانشجو لرنینگ دانشگاه گه کیریشی تیزلیک بیلن قیته برقرار بۉلیشی و تحصیل لری نینگ کیله سی جلسه گچه مختل بۉلمسلیگینی بویردی. بو قضایی حمایه حاضرگی پیتده ۳۲ دانشجو نی اۉز ایچیگه آله دی.
PMDC نینگ بو قراری کینگ کولملی تنقید لر بیلن روپه ره بۉلگن. عفو بین الملل سازمانی، بو سیاست نینگ، خصوصاً افغانستانده عالی تحصیلدن محروم بۉلگن افغان خاتین-قیزلر اوچون، جدی عاقبت لرگه اېگه بۉلیشیدن آگاهلنتیرگن. بو دانشجو لرنینگ کپچیلگی پاکستان دولتی نینگ بورسیه لری بیلن تحصیل آله دیلر.
عین حالده، پاکستان تشقی ایشلر وزیرلیگی، معتبر ویزه گه اېگه بۉلگن و معتبر دوره لرده ثبت نام قیلگن افغان دانشجو لرنینگ تحصیل لرینی تکمیلله ی آلیشلرینی بیلدیرگن. بو موضع، PMDC نینگ قراری بیلن تضادده کۉرینیب، سردرگم لیککه سبب بۉلگن.
سند محکمه سی نینگ بو حکمی، ایککی هفته آلدین بلوچستان عالی محکمه سی نینگ افغان دانشجو لرنینگ شو کبی درخواستی نی رد قیلگنی و چیت اېل تبعه لری نینگ پاکستانده دولت قراریگه قرشی دایمی قالیش یا تحصیل آلیش حقیگه اېگه ایمسلیگینی ایتگن بیر پیتده صادر بۉلماقده. لیکن، پنجاب و خیبرپختونخوا ده گی محکمه لر باشقه مورد لرده دانشجو لرگه موقت حمایت بېرگنلر.
سند محکمه سیده گی دوسیه، PMDC دن جواب آلینگونگه قدر کیینگه قالدیریلگن، لیکن بو موقت حکم، تحصیل لری نینگ یریمده قالیشیدن خواطرده بۉلگن افغان دانشجو لر اوچون مهم بیر غلبه دیر.
منبع: زرین تلویزیون
🌐
