طالبان حکومتی نینگ سۉزچیسی ذبیح الله مجاهد، پنجشنبه ایرته لب، ۹ میزانده، پاکستان نینگ حربي اوچاقلری کنر و هلمند ولایتلریده گی اهالی یشه یدیگن منطقه لرنی بمباردمان قیلگنینی معلوم قیلدی. اونینگ ایتیشیچه، «تجاوز» و «جنایت» دېب اتلگن بو هجوملر، عیاللر و باله لرنی هم اۉز ایچیگه آلگن ۹ نفر تینچ اهالی نینگ هلاک بولیب و باشقه ۱۱ کیشی نینگ یره لنیشیگه سبب بولگن.
بیریلگن تفصیلاتگه کۉره، هجوملر کنر ولایتی نینگ شلتن و چوگام ولسوالی لری بیلن هلمند ولایتی نینگ گرمسیر ولسوالیسیده یوز بېرگن. هلمند ده گی محلی طالبان مقام لری نینگ خبر بېریشیچه، گرمسیر نینگ صفار منطقه سیگه قیلینگن هوا هجومیده ایکی یشاو اووی ویران بولیب، تۉرت نفر تینچ اهالی هلاک بولگن و آلتی کیشی یره لنگن. شونینگدېک، کنرده هم، شلتن ولسوالیسیده بیر یشاو اووی نشانگه آلینیب، نتیجه ده بېش تینچ اهالی هلاک بولگن و اوچ کیشی یره لنگن.
بونگه قرشی، پاکستان نینگ اطلاعات وزیرلیگی بو هوا هجوملرینی تاییدلب، بو هدفی عملیاتلر افغانستانده گی پاکستان طالبان تحریکی (TTP) و بلوچ حربي گروه لری نینگ پناهگاه لریگه قرشی آلیب باریلگنینی بیلدیردی. اسلام آباد بو هجوملرده «۲۲ تروریست» نینگ اۉلدیریلگنینی و کۉپ مقدارده قورال و مهمات نینگ یۉق قیلینگنینی ادعا قیلماقده.
پاکستان اطلاعات وزیرلیگی نینگ بیانیه سیده کېلتیریلیشیچه، بو هجوملر انیق استخباراتی معلوماتلر اساسیده و «غضب للحق» ناملی حربي عملیات نینگ دوامی صفتیده عملگه آشیریلگن. اسلام آباد اۉز خوفسیزلیک کوچلری نینگ تروریزم گه قرشی عملیاتلری تهدیدلرنی یۉق قیلیش اوچون تۉلیق کوچ بیلن دوام اېته جگینی تاکیدله دی.
بو پاکستان نینگ افغانستان توپراغیگه بیرینچی مرته هوا هجومی اویوشتیریشی اېمس. بوندن آلدین هم قندهار، خوست و پکتیا ولایتلریده گی بعضی منطقه لر شو کبی بمباردمانلرگه دوچ کیلگن اېدی، که هر دایم طالبان حکومتی و افغان سیاسی چهره لری نینگ کېسکین عکس العمللریگه سبب بولگن.
طالبان سۉزچیسی بو هجوملرنی قتتیق قاره لش بیلن بیرگه، اولرنی بارچه خلق ارا اصوللرگه ضد و افغانستان نینگ ملی حاکمیتیگه آچیق تجاوز دېب اته دی. کابل و اسلام آباد مناسبتلریده گی کېسکینلیک، افغانستان توپراغیده پاکستان طالبان تحریکی جنگریلری نینگ موجودلیگی مسئله سی یوزه‌سیدن سونگگی ییللرده جوده آشگن.
منبع: خبر آژانسلیکلری
🌐
