نورستان ولایتی نینگ کامدیش ولسوالی سیده قوراللی مخالف لرنینگ سۉنگگی هجوملری آرتیدن، بو ولایتده گی طالبان پولیس قوماندانی قۉشیمچه کوچلر یوباریلیشینی سۉره‌دی. آزادلیک جبهه‌سی بو هجوملر مسئولیتینی اۉز بوینیگه آلگن بیر پیتده، طالبان رسمی‌سی مقاومت جبهه‌سی نینگ هم اونده رول اۉینه‌گنینی ادعا قیلماقده.
نورستان اوچون طالبان امنیه قوماندانی ملا اخترمحمد مزمل، بیر ایچکی رسانه بیلن صحبتده، پاکستان نینگ بو هجوملر اوچون ۳۰۰ دن ۴۰۰ گه قدر افغان یاشینی دیورند چیزیغی نینگ نری تامانیدن نورستانگه یوبارگنینی ادعا قیلدی. او، هجومچیلرنینگ کۉپچیلیکنی سابق حکومت نینگ حربی لریدن تشکیل تاپگنینی قۉشیمچه قیلدی. پاکستان ایسه بو ادعانی رد اېتگن.
بو طالبان قوماندانی، گروه نینگ مدافعه وزیرلیگی ادعاسی نینگ خلافیگه، داعشنی بو هجوملرده قۉلی بارلیگی بیلن عیبله مه‌دی، لېکن آزادلیک جبهه‌سی یانیده «مقاومت جبهه سی» نینگ هم بو هجوملرده اشتراک اېتگنینی ادعا قیلدی. آزادلیک جبهه‌سی آلدینراق بو هجوملر مسئولیتینی اۉз بوینیگه آلگن اېدی.
او نورستان نینگ ستراتیژیک موقعیتیگه اشاره قیلیب، شوروی کوچلری و جمهوری نظامگه قرشی اوروشلر هم شو کبی یۉللردن دیورند نینگ نری تامانیدن باشلنگنینی ایتدی. لېکن، او مخالف لر بو سفر موفق بۉلمسلیکلرینی، چونکه اونینگ سۉزلریگه کۉره، خلق اولرنی قوللب-قوتلمه یدیگنینی بیلدیردی.
جناب مزمل، طالبان ایچکی ایشلر وزیری سراج الدین حقانی و باشقه رسمی‌لردن نورستانگه قۉشیمچه کوچلر یوباریلیشینی سۉره‌گنینی ایتدی. او، بو کوچلرنینگ محلی اهالی آره سیدن استخدام ایتیلیشینی و پاکستان بیلن چېگره داش ولسوالی لر اوچون اوچ تولی و باشقه ولسوالی لر اوچون بیر تولی قۉشیمچه کوچ سۉره‌گنینی تکلیف قیلدی.
طالبان مدافعه وزیرلیگی آلدین کامدیشده گی تۉقنشوولر ۴۱ قوراللی مخالف نینگ اۉلدیریلیشی و باشقه ۶۱ کیشی نینگ قولگه آلینیشی بیلن یکونلنگنینی ادعا قیلگن اېدی. نورستان امنیه قوماندانی بو تۉقنشوولرده بیر قطار طالب جنگچیسی نینگ یره لنگنینی تصدیقله‌دی.
منبع: ایچکی رسانه‌لر
🌐
