د طالبانو یوې مخالفې وسله والې ډلې "د افغانستان متحدې جبهې" د هلمند ولایت په مرکز لښکرګاه ښار کې د دې ډلې پر ځواکونو د دوو جلا بریدونو مسوولیت منلی دی. دا جبهه ادعا کوي چې په دې بریدونو کې یو طالب جنګیالی وژل شوی او یو بل ټپي شوی دی.
دې جبهې د یکشنبې په ورځ، د میزان په ۱۲مه، د خبرپاڼو په خپرولو سره اعلان وکړ چې لومړی برید د لښکرګاه ښار د دویمې امنیتي حوزې پر قراول شوی دی. د دې ادعا له مخې، د متحدې جبهې ځواکونو پر دغه قراول د لاسي بم په غورځولو سره یو طالب غړی ټپي کړی دی.
په یوې جلا خبرپاڼه کې، دې جبهې ادعا کړې چې ځواکونو یې د لښکرګاه ښار په "باباجي" سیمه کې په یوه بل "هدفي برید" کې یو بل طالب غړی وژلی دی. د دې هدفي برید د څرنګوالي په اړه نور جزئیات نه دي ورکړل شوي.
د طالبانو د حکومت محلي او مرکزي چارواکو تر اوسه د دې دوو بریدونو او د "افغانستان متحدې جبهې" لخوا د شویو ادعاوو په اړه هیڅ ډول غبرګون نه دی ښودلی.
د دې ادعاوو صحت او ناسموالی په خپلواکه توګه د تایید وړ نه دی. د طالبانو مخالفې وسله والې ډلې اکثرا د هیواد په بیلابیلو سیمو کې د دې ډلې پر ځواکونو د بریدونو مسوولیت پر غاړه اخلي، خو طالبان معمولا د دا ډول پیښو په اړه چوپتیا غوره کوي یا د خپلو ځواکونو تلفات نه تاییدوي.
د "افغانستان متحده جبهه" یو له هغو څو وسله والو ډلو څخه ده چې د ۲۰۲۱ کال په اګست کې د طالبانو له بیا واکمنیدو وروسته یې د دې ډلې پر وړاندې د خپل شتون اعلان کړی دی. دا جبهه ډیری په سویلي ولایتونو، په ځانګړې توګه هلمند کې، فعاله ده او وخت په وخت د طالبانو پر ځواکونو د بریدونو د ترسره کولو خبر ورکوي.
هلمند د طالبانو د ځواک له اصلي مرکزونو څخه ګڼل کېږي، خو دې ولایت په وروستیو کلونو کې د مخالفو وسله والو ډلو د تیت او پرک فعالیتونو شاهد هم و.
سرچینه: د افغانستان متحده جبهه
🌐
