پاکستان، سعودی عربستان و ترکیه مملکت لری نینگ تشقی ایشلر و مدافعه وزیرلری همده قوراللی کوچلر باشلیق لری دوشنبه کونی، ۱۳ میزان ده، ریاض شهریده مکه مدافعه پیمانی نینگ ایکّینچی ییغینی نی اوتکزدیلر. بو ییغین مشترک ائتلاف نی تقویتلش، حربی صناعت لرنی رواجلنتیریش و منطقه نینگ سونگگی خوفسیزلیک اوزگریشلرینی کورب چیقیش مقصدی بیلن یولگه قوییلدی.
پاکستان تشقی ایشلر وزیرلیگی نینگ بیانیه سیگه کوره، اوشبو مملکت نینگ یوقاری مرتبه لی هیئتی، باش وزیر اورینباسری و تشقی ایشلر وزیری محمد اسحاق دار، مدافعه وزیری خواجه محمد آصف و اردو باشلیغی جنرال عاصم منیر، بو ییغینده قتنه شیش اوچون ریاض گه سفر قیلگن. ترکیه نینگ تشقی ایشلر وزیرلیگی هم تشقی ایشلر وزیری هاکان فیدان و مدافعه وزیری یاشار گولر نینگ حضوری نی تاییدله‌دی.
بو ستراتیژیک ییغین نینگ میزبانلیگی نی سعودی عربستان نینگ یوقاری مرتبه لی مقام لری، جمله‌دن تشقی ایشلر وزیری شهزاده فیصل بن فرحان و مدافعه وزیری شهزاده خالد بن سلمان اوز اوستیگه آلگن ایدی. بو ییغین اوچ منطقه وی کوچ آره‌سیده مدافعه همکارلیک لرینی نهادلشتیریش یولیده گی ینه بیر قدم سنه له‌دی.
بو ییل ۱۶ اسد ده امضالنگن مکه مشترک مدافعه کیلیشووی، جمعی توسیق اصل لریگه اساسلنگن بیر ستراتیژیک پیمان دیر. بو پیمان اساسیده، اعضالردن بیری نینگ چیگره سیگه هر قندهی تجاوز یا-ده قوراللی هجوم، اوچ مملکت نینگ برچه‌سیگه قرشی هجوم دیب قبول قیلینه‌دی. بو اصل، اوشبو ائتلاف نینگ حربی و خوفسیزلیک همکارلیک لری نینگ اساسی نی تشکیل ایته‌دی.
بو کمیته نینگ بیرینچی ییغینی ۹ سنبله ده استانبولده اوتکزیلگن ایدی. او ییغینده، تامانلر سعودی عربستان توپراغیده دایمی بیر دبیرخانه قوریش و همده یینги تکنالوژی و ایلغار مدافعه محصول لری نی انتقال بیریش بوییچه مشترک همکارلیک لرنی باشلش توغریسیده کیلیشگن ایدیلر.
ریاضده بو ییغین نینگ اوتکزیلیشی، اورته شرق و غرب آسیا ده خوفسیزلیک بحران لری نینگ کوپه ییب باراتگن بیر شرایطده یوز بیرماقده. بوندن آلدین، اوچ مملکت نینگ تشقی ایشلر وزیرلری بیرلشگن ملت لر تشکیلاتی عمومی مجمعی یانیده، سعودی عربستان نینگ تینچ اهالی تاسیساتلریگه قیلینگن سونگگی هجوم لرنی قاره لب، مشترک حمایوی تدبیرلرنی هماهنگ قیلیشگه تاکید قیلگن ایدیلر. بو حرکتلر، منطقه نینگ خوفسیزلیک ساختاریده بیر ینги و مستقل مدافعه بلوکی نینگ شکللنه یاتگنی دن حکایت قیله‌دی.
منبع: پاکستان و ترکیه تشقی ایشلر وزیرلیکلری
🌐
