خلق ارا جنایی محکمه سی، طالبان نینگ معارف وزیری حبیب الله آغا و عالی تحصیلات وزیری ندا محمد ندیم نینگ توتیش بویروغینی، انسانیتکه قرشی جنایت حسابلنگن عیال و قیزلرنی اذیت و آزار قیلگن لیک عیبلاوی بیلن آشکار قیلدی. بو ایکّی مقام افغان عیال و قیزلرینی تعلیم حقیدن محروم قیلیشده اساسی رول اۉینه گنلر.
حبیب الله آغا، قندهار ولایتی نینگ ارغنداب ولسواللیگیده توغیلگن، طالبان نینگ قضایی تشکیلاتی و دینی مدرسه لریده سابقه سی بولگن اېسکی چهره لریدن دیر. او ۱۳۵۷ نچی ییلده پاکستان نینگ حقانیه دارالعلومیدن فارغ بولیب، طالبان نینگ بیرینچی حاکمیتی دوریده قندهار شهری نینگ ابتدایی محکمه سی جزا دیوانی نینگ رئیسی بولگن و اوندن سۉنگ هم اوشبو گروه نینگ قضایی ساختاریده فعالیت قیلگن. طالبان نینگ قدرتگه قیتیشیدن سۉنگ، او آلدین قندهار علما شوراسی نینگ رئیسی و سۉنگره ۱۴۰۱ نچی ییل سنبله آییده معارف وزیری اوله راق تعیینلندی.
حبیب الله آغا نینگ وزیرلیگی دوریده، طالبان رهبری نینگ آلتینچی صنفتن یوقاری قیزلر مکتب لرینی یاپیق قالدیریش بوییچه امری شدت بیلن اجرا اېتیلدی. بوندن تشقری، خصوصی تعلیمی مرکز لر هم قیزلر یوزیگه یاپیلدی و اولرنینگ پرستارلیک کبی رشته لرده تعلیم آلیشی توخته تیلدی. بو سیاستلر قیزلرنی مخفی اوی تعلیمیگه یوزلنتیریشگه سبب بولدی.
عالی تحصیلات وزیری ندا محمد ندیم هم قندهارده توغیلگن و طالبان رهبریگه یقین و تیز فکرلی چهره لردن حسابلنه دی. او طالبان نینگ حربی و استخباراتی قسم لریده اوزون سابقه گه اېگه و بو منصبتن آلدین کابل و ننگرهار والیسی و ننگرهار پولیس قوماندانی بولگن. او ۱۴۰۱ نچی ییل میزان آییده بو سمتگه تعیینلندی.
ندیم نینگ تعیینلنگنیدن تقریباً ایکّی آی سۉنگ، ۱۴۰۱ نچی ییل قوس آیی نینگ ۲۹ نچی کونیده، عالی تحصیلات وزیرلیگی دولتی و خصوصی عالی اۉقوو یورتلریده عیاللر تحصیلینی «کیینگی امرگه قدر» منع قیلینگنینی اعلان قیلدی. بو قرار قیزلرنینگ تعلیم منعیتی نی عالی اۉقوو یورتلریگه هم کینگه‌یتیردی. ندیم بو قرارنی مدافعه قیلیب، عیاللرنینگ کییم نوعی و زراعت و انجنیری کبی رشته لرنینگ «افغانستان فرهنگی» بیلن ماس کیلمس لیگینی دلیل اوله راق کېلتیردی.
ندیم، مشکل لرنینگ حل اېتیلگنیدن سۉنگ عالی اۉقوو یورتلری نینگ قیته آچیلیشینی وعده بیرگن اېدی. لیکن تقریباً ایکّی ییل کیین، ۱۴۰۳ نچی ییل سنبله آییده، او عیاللرنینگ تعلیمی «تۉخته تیلگن» کبی، بو حقده گی سۉراقلر هم «ایکنچی امرگه قدر تۉخته تیلگن» دیب ایتدی. اروپا اتفاقی آلدینراق هر ایکّی وزیرنی عیاللرنینگ تعلیم حقینی پامال قیلیشده گی روللری اوچون تحریم قیلگن اېدی.
منبع: افغانستان اینترنشنال
🌐
