طالبان نینگ سوزچیسی ذبیح الله مجاهد، اوشبو گروه نینگ ایکّی وزیری نینگ توتیش بویروغی آشکار بولگنیدن سۉنگ، طالبان حکومتی خلق ارا جنایی محکمه سینی تانیمس لیگینی و اونینگ قرارلریگه «اهمیت بیرمس لیگینی» معلوم قیلدی.
مجاهد دوشنبه کونی نشر قیلگن بیر بیانیه ده، طالبان رهبرلری «هیچ قنده‌ی محکمه تامانیدن توتیلیش یاکه جزاگه تارتیلیشگه لایق هیچ قنده‌ی ایش قیلمگنلر» دیب ایتدی. او بو تشکیلاتنی «خلق ارا دیب آتلگن» و «استخباراتی» محکمه دیب آته دی و طالبان نینگ فقط اۉزینی اسلامی شریعت احکامی و اونینگ محکمه لریگه باغلیق حس قیلیشینی تاکیدله دی.
طالبان سوزچیسی محکمه نینگ موضع سینی قاره لب، اوشبو تشکیلاتدن اۉز اعتبارینی و جایگاهینی سقلب قلیش اوچون «صلاحیت و قضایی حوزه سیدن تشقری ادعا قیلمس لیگینی» سۉره دی. بو بیرینچی مرته اېمس که طالبان افغانستانگه تیگیشلی دوسیه لرنی کۉриб چیقیش اوچون خلق ارا جنایی محکمه سی نینگ صلاحیتی نی رد اېته دی.
طالبان بیانیه سی نینگ بیر قسمیده شونده ی کیلگن: «افغانستان «خلق ارا محکمه» نامی آستیده هیچ قنده‌ی محکمه نی تانیمیدی و اونینگ موضع لری و حکم لریگه هم اهمیت بیرمیدی». بو موضع، طالبان نینگ شریعتدن اۉز تفسیری بیلن توقنشگن خلق ارا تشکیلاتلر و قانونلرنی اعتبارگه آلمسلیک بوییچه دواملی یانداشوینی کورسه ته دی.
طالبان نینگ معارف و عالی تحصیلات وزیرلری نینگ توتیش بویروغی، عیال و قیزلرنی سیستملی شکلده باستیرگنلیک سببلی انسانیتکه قرشی جنایتلر عیبلاوی بیلن صادر بولگن. محکمه نینگ بو اقدامی حقوق بشر فعاللری و افغانستان نینگ بعضی سابق مقام لری تامانیدن خوش قرشیلنگن، لیکن طالبان نینگ عکس العملی بو بویروقلرنینگ یقین کیله جکده اجرا اېتیلیشی جدی توسیقلر بیلن روپره بولیشینی کورسه ته دی.
طالبان ۱۴۰۰ نچی ییل اسد آییده قدرتگه قیتگنیدن بیری، دواملی شکلده خلق ارا جمعیت بیلن حقوق بشر، خصوصاً عیاللر حقوقی و حکومت ساختاری کبی مسئله لر بوییچه تنش ده بولگن. خلق ارا جنایی محکمه سی نینگ صلاحیتی نی رد اېتیش هم شو دایره ده بهالنه دی.
منبع: طالبان نینگ بیانیه سی
🌐
