افغانستان نینگ سابق عدلیه وزیری فضل احمد معنوی، خلق ارا جنایی محکمه سی تامانیدن طالبان نینگ ایکّی وزیری نینگ توتیش بویروغی آشکار بولگنینی خوش قرشیله دی. او بو اقدامی افغانستانده حقوق بشر پامال بولیشینی تیکشیریش دوسیه سی نینگ هلی هم آچیق ایکن لیگیدن نشانه دیب بیله دی.
جناب معنوی دوشنبه کونی اۉزی نینگ اکس اجتماعی ترماغیده گی حسابیگه، محکمه نینگ بو قراری «کیشیلرنینگ حقوقی مسئولیتی وقت اۉتیشی بیلن یوقالیب کیتمس لیگینی» کورسه ته دی دیب یازدی. او بو اقدامی خوش قرشیله ب، کیینگی آدیم لرنی «تیزراق و قاطعراق» شکلده تشلنیشینی سۉره دی.
افغانستان نینگ سابق عدلیه وزیری، قربانلر اوچون عدالت نینگ، حقوق بشرنی پامال قیلگن عامللر اۉز ایشلریگه جواب بیرگنده معنا قازانیشینی تاکیدله دی. بو موضع، کۉپلب قربانلر و حقوق بشر فعاللری نینگ افغانستانده یوز بیرگن جنایتلرنینگ اونتیلیب کیتیشیدن خواطرده بولگن بیر پیتده بیان اېتیلماقده.
خلق ارا جنایی محکمه سی دوشنبه کونی طالبان نینگ معارف وزیری حبیب الله آغا و عالی تحصیلات وزیری ندا محمد ندیم نینگ توتیش بویروغینی آشکار قیلدی. ۱۴۰۴ نچی ییل سنبله آیی نینگ ۱۸ نچی کونیده صادر بولگن بو بویروقلر، اوشبو ایکّی مقام نینگ عیال و قیزلرنی سیستملی شکلده باستیرگنلیگی و اولرنی تعلیم و تحصیل حقیدن محروم قیلگن لیگی سببلی بولگن.
بوندن آلدین، محکمه ۱۴۰۴ نچی ییل سرطان آییده طالبان رهبری هبت الله آخندزاده و اوشبو گروه نینگ عالی محکمه سی رئیسی عبدالحکیم حقانی نی توتیش بویروغینی هم صادر قیلگن اېدی. بو بویروقلرنینگ آشکار بولیشی، طالبان رهبرلرینی اۉز سیاستلریگه جوابگرلیککه تارتیش اوچون امیدلرنی آرتیرگن.
فضل احمد معنوی و سابق حکومت نینگ باشقه مقام لری خلق ارا جمعیتدن طالبانگه حقوق بشرنی رعایت قیلیش اوچون فشارلرنی آشیریشلرینی و جنایت عامللرینی عدالتگه تاپشیریشلرینی کۉپ مرته سۉره گنلر. خلق ارا جنایی محکمه سی نینگ سونگگی اقدامی بو یولده مهم بیر قدم صفتیده کۉریله دی.
منبع: فضل احمد معنوی نینگ اکس حسابی
🌐
